22. septembrī paīt 100 godu nu literaturzynuotnīka Heronima Tihovska dzimšonys.

Heronims Tihovskis dzims 1907. goda 22. septembrī Pyldys pogosta Potorovā. Vuiceibys suocs Potorovys treisgadeigajā tautškolā, 1922.godā pabeidzs Ludzys piļsātys pamatškolu i 1926. godā – Ludzys Valsts gimnazeju.  Jau školys laikā izveiduojs i vadiejs literarū žurnalu „Vita Nostra”, kurā publiciejs ari sovus rokstus.

1926. – 1933. godā vuiciejīs Latvejis Universitatis Filologejis i filozofejis fakultatis Baltu filologejis nūdaļā.

Struoduojs par školuotuoju Rēzeknis komercškolā, Rēzeknis Valsts ebreju gimnazejā, Ludzys gimnazejā, bejs ari latvīšu i krīvu volūdys doceituojs LU i Angļu volūdys institutā, Izgleiteibys ministrejis tautškolu direktora bīdrs i Pamatškolu nūdalis vacuokais inspektors. 1942.-1944. godā bejs žurnala „Izgleiteibys Ministrejis Mienešroksts” redaktors.

Tihovska roksti par Latgolys kulturys, literaturys, viesturis, audzynuošonys vaicuojumim i puorskoti par Latgolys literaturu publiceiti laikrokstūs „Latgolys škola”, „Sauleite”, „Latgolys vuords”, „Jaunais vuords”, „Jaunākās Ziņas”, „Daugava”.

1939. godā Heronims Tihovskis publiciejs sovus nūzeimeiguokūs pietiejumus „Latgolys školu viesture” i „Kuozu paražys Latgolā”.

1944. goda rudinī Heronims Tihovskis emigriejs iz Vuoceju, kur uzsuocs vuiceibys Bonnys universitatē. 1949. godā dabuojs filozofejis doktora grādu par disertaceju „G.E.Lesinga i D.Didrio dramys teoreju saleidzynūša apcere”.

1950. godā nūbraucs iz Kanadu, kur bejs Ontario provincis Izgleiteibys ministrejis uorpusškolys padūmnīks jaunūs volūdu vuiceišonā i ministrejis tulks, organiziejs Kanadys latvīšu sabīdriskū dzeivi, publiciejs rokstus par Latvejis viesturi i Baltejis problemom, kai ari papyldynuojs zynuošonys ģermāņu i slāvu filologejā Toronto universitatē. 1954.godā sastuodiejs rokstu kruojumu „Latvīšu trymdys 10 godi”, 1958.godā – latvīšu dzejis antologeju „Ave Maria”.

1960. godā Tihovskis puorsacieļs iz ASV, kur bejs doceituojs universitatēs i slavistikys žurnalūs publiciejs rokstus i apceriejumus par baltu i slāvu kulturu i literaturu.

Piec pensioneišonuos atsagrīzs Kanadā, kur vadiejs J.Rancāna fondu. Trymdā izdevs rokstu kruojumus „Veiskups Jezups Rancāns” , „J.Rancāna rokstu izlase”.

Heronims Tihovskis mirs 1991. goda 20.novembrī Kanadā, paglobuots Jorkys kopsātā Toronto.

Informacejis olūti: enciklopedeja „Latgolys kulturys darbinīki” i škārsteikla materiali

Sagatavieja Laura