Latgolys Teatrs – „Valni” /Vacūs gazetu viests
![Latgolys Teatrs – „Valni” /Vacūs gazetu viests](https://www.lakuga.lv/wp-content/uploads/2012/10/sekmis-škol.jpg)
Latgolys Teatrs sastdiņ š.g. 24. sept. atkluoja sovu sezonu ar J. Bračis dramu „Valni”. Sovaidi gon, ka teatra vadeiba sovuos telpuos ļuove atkluot šuo rudiņa sezonu kaidam cytam teatram, bet sovu nūvylcynuoja uz progresistu kongresu, taidā kuortā padorūt tū par danču vokoru. Izruodis laikā pastuoveigi vyrynuoja durovys (laikam iz bufeti), bet eistus muokslys draugu beja moz.
Latgolys Teatrs interesi mudynoj ar tū, ka pi tuo saisteiti daži jauni akteri i režisors J. Prīde. Jaunais režisords bejis Dailis Teatra akters un sovys zynuošonys papyldynuojis Moskovys teatrūs un sovā dorbā līkās byus meklietuojs – eksperimentietuojs. Dailis teatra eksperimenti na kotrreizi iztulkoj muokslys dorbu ar vajadzeigū dziļumu, bet cerēsim, ka L. T. J. Prīde spēs atdzeivynuot un cīneigi turpynuos Lauberta tradicejis.
J. Bračs ir jauna rakstneica un vēļ jaunuoks juos dorbs „Valni”. Piec satura tī asūt apgrīzti „Indrāni”. Tikai muokslys ziņā šis dorbs ir susātivs nu Blaumaņa „Indrānim”. Par daudzi speid cauri tendence Uozinēs izputejuša saiminīka Kyukuma personā karikēt sovu veira tāvu, kas nūvedis leidz skandalam un tīsai (!). Vyspuorejūs detaļūs autorei izadeve raksturuot lauku muoju saiminīku un juo bārnu intrigys, ap tāvu storp sevim, montuojuma deļ. Tikai nikas te jauns nav pateikts, kū ir teikuši jau agruok myusu lobuokī dramatiskī, ari formys ziņā autore nasnādz nikuo jauna. Šū dorbu ruodeja ari Nac. Teatrs, bet dreiži viņ tur nūzuda nu skotuvis. Vysu lugys smogumu šureiz iz placim juoiznas E. Požam (Kyukums) un jaunai aktrise V. Vysockai (Made). Podis šūreiz teišam pīlicis daudz pyuļu, lai paruodeitu mums vacu, 80 g.v. zemnīku, kas izsyukdams mat. ziņā sovu daļu, tūmār nūlaiž sovu muoju leidz galeigam pūstam nu akcionaru. Atseviškus viļcīņus Podis labi izcēle, tūmār vēļ tuoli leidz piļneibai, lai paruodeitu dzeivu, piļneigi taidu lauku tipu. V. Vysockys spēlē var redzēt, ka ir zyn. škola. Ekspreseja saskanieja ar uorejom kusteibam un ļūti reljefi izcēle Madis, saiminīka meitys, skūpulis, intrigantis leidz cinizmam ekzoļtētu dobu. Sovys spiejis jaunuo aktrise ruodeis nuokūtnē.
K. Skangeļs – Kyukuma dāla Andreja lūmā beja lobs, bet cīši kusteigs deļ juo 47 godim, kas na kotru reizi ļuove konkreti izskaidruot šuo energiskuo, labsirdeiguo, bet nu tāva cītsirdeibys salauztuo zemnīka dobu. Sovys duovonys na vysā varieja paruodeit A. Vorslovāns un A. Apeine nanūzeimeigu lūmu deļ. Pādejī divi īzastuojuši teatra školā Reigā un mes jim nūvielejam vysleluokūs panuokumus muokslys dryvā. V. Podis (Marga) šūreiz daudz progresejuse un sovu lūmu spieleja disciplinieti. Puorejuos lūmuos J. Irbīte, J. Daukste, B. Tučs, M. Kravaļs un c. B. Tučs sova žanra lūmuos vīnmār lobs un patīss. Spēlei par slyktu nuoce bez šaubom nabadzeigais un seņ apnykušais inscenejums. Par spēlis diciplinu pateiceiba rež. J. Prīdei. Izruodi vadeja K. Skangeļs. Traucieja šausmeiguo latg. izlūksnis krūpļuošona, kai akcents, tai ari atseviški nalatgaliski vuordi. Par latgalisku, teiru volūdu nav ryupejusēs ni teatra komiseja, ni akteri.
H. T.
Olūts: Latgolys Words. – Rēzekne, 1932. g. 28. septembrī. – Nr. 39. – 3. pl.
Komentari