Leidz reitdīnai, 9. oktobrim Nacionaluo teatra Jaunajā zalā i Akteru klubā „Hamlets” nūteik 10. Storptautyskais monoizruožu festivals „Zvaigzne”, kurā pīsadola izruodis i akteri nu Lītovys, Izraelys, Vuocejis, Moldovys i Latvejis.

Itūgod vīna nu festivala izruodem skanēs ari latgaliski. 9. oktobrī 13:00 iz Nacionaluo teatra skatuvis Reigā Monikys Zeilis izruodi „Rūžys byudu golūs” izdzeivuos ari Daugovpiļs teatra aktrise Maija Korkliša. Bileti iz izruodi nūpierkami „Biļešu paradīze” kasēs.

Festivals aizasuoce 5. oktobrī ar pārnuo festivala „Zvaigzne” i cytu festivalu laureata aktera Andra Buļa monoizruodi „Lidojums”, nu ituo goda jubileja festivala leluokais nūtykums vuocu aktera Gerda Fosa (Gerd Voss) izruode „Vīnkuorši sarežgeiti” (Einfach kompliziert) muokslenīka aizjimteibys deļ puorcalts iz 2013. goda pavasari.

„Rūžys byudu golūs” ir Monikys Zeilis speciali aktrisei Maijai Kuorklišai latgaliski saraksteita izruode. Lugā ir īkļautys realu dzeivisstuostu detalis, tuos golvonū varūni sauc Monika, kas ir kai veļtejums autoris dzymtai, kurā itys vuords beja populars.

Izruode ir 2010./2011. godu teatra sezonys lobuokuo režisora Pītera Krilova (Pēteris Krilovs) radūšuo atsagrīzšona Daugovpiļs teatrī piec 17 godu puortraukuma. Lugys īstudiešona kai ūtrei režisore struodoj Anita Spruoge (Anita Sproģe). Pīters Krilovs nūruodeja, ka itys ir cīši rešs nu eipašs gadiejums, seviški Latvejā, kod autors saroksta dorbu konkretam akteram, pībiļstūt, ka Monikys Zeilis saraksteituo luga ir cīši kvalitativa i dorbam pateiceiga, jo nasaverūt iz individualitati, lugys varūnē gondreiž kotra skateituoja varēs atpazeit sevi.

Maija Kuorkliša atzeist, ka struodojūt pi ituo īstudiejuma, jei tū veļtej sovam aizsaulē aiguojušam Papam, kurs byutu cīši lepuojīs, ka meita nu skatuvis runoj juo dzymtajā volūdā.

Izruodis režisori – Pīters Krilovs i Anita Spruoge. Scenografs – Uģis Bierzeņš. Kostimu muokslineica – Kristīne Abika. Tautysdzīšmu apdaris taisiejs Arturs Uškāns.

Karteņā – Maija Korkliša, Rūžys byudu golūs, foto Džeina Saulīte