Tovs leluokais īnaidnīks? Varbyut kiosks?

Nui, tei ir masa. Bet tei vaira nav saziņa. Nadūmojit, ka maņ ir naideiga nūstuoja pret žurnalistim. Es poša taida beju. Drupeit asu. Izdūdu laikrokstu „Siržu Vuoki”. Es rokstu relīzis, zeimeju karikaturys, maņ ir pošai sova laika ziņu lopa. Maņ nav horoskopu. Bet maņ ir sudoku spielis. Ar skaitlim nu 11 leidz 19. Tu mani abonej nu pārnejuo goda 14. septembra. Tev ir atlaidis. I „Siržu Vuoku” atvārumā vysod Tev ir pa kaidam plakatam. Es Tev aizturieju riekinus, deļ tuo ka Tu navari samoksuot nikod laiceigi. Bet es Tevi mīļoju, es dūmoju, ka es Tev atlaisšu grākus. Voi Tu atlaissi maņ munus?

Oktobra „Siržu Vuoki” šūreiz jaunuos kruosuos. Pyrmū reizi ekskluziva intervija ar Napruotu. Dīmžāļ bez fotografejom, deļ tuo ka intervejamais stingri atsasaceja fotografietīs. Jauna rubrika – „Izpietej sovu Sirdsapziņu”. Ite apsaviersim leluokūs plašsazinis leidzekļu mītus par Sirdsapziņu. Meklēsim atbiļdis iz vaicuojumu – Voi Sirdsapziņa ir paruodeiba, rakstura eipašeiba voi varbyut diagnoze? Nūslāgumā byus īspieja izpiļdeit testu i nūsaceit sovu Sirdsapzinis koeficientu. Tai lyuk. Ticiesim žurnalim. Par tū jau mes moksojam! Lai uzzynuotu patīseibu poši par sevi. A kas ūtrā golā sēd? Taidi poši kai mes. Kaids varbyut ar mierki nūpeļnēt.

Muna redakcija gaida Tevi. Gaida Tevi nu munys bierenibys. Kod mes kūpā izdūsim kaidu laikrokstu? Niu es Tevi zynu. Tu mani vēļ nazini. Bet varbyut nikod ari nauzzynuosi.

Sadadzynoju pyrmūs numurus. Taids diletanta dorbs viņ beja. Tagad asu auguse. Tagad augstys skūlys beigtys. Diploms kabatā, kai soka. I diploms sirdī, kai nasoka. Vīnkuorši napareizī cylvāki abonej napareizūs žurnalus. I tod pa napareizim kanalim nūīt napareizuo informaceja otkol pi napareizajim cylvākim. Radzi apbūrtū lūku? Vīnkuorši navajadzātu dūt žurnalus skaiteit mozim bārnim. Kotrs sirdī ir bārns. Vysi Dīva bārni. Tod jau izīt, ka žurnalu skaiteišona ir kaiteiga kotram.

Es naasu uorsts, ni ari psihologs, es tikai pasastaigoju dūmu pogolmūs. Cikom Tu abonej munus „Siržu Vuokus”…

_____

“Dūmu pylni pogolmi” ir apzinis plyusma. Maņ pateik, ka es varu izlikt tū, kas vydā, i varbyut kaids cylvāks munūs tekstūs kū atrass. Bīži rokstu par mīlesteibu, bīži par nalaimeigu mīlesteibu, tī vēļ ir taidi ezeiši i vysakas. Laura