Jaunu video klipu sataisejuse Rēzeknis hip-hop apvīneiba “Ausmeņa Records”. Niu nūsavērt klipu i nūsaklauseit dzīsmi “Vipingys psihiatriskuo slimneica” pīduovojam ari LaKuGys skaiteituojim.

Gobola muzykys autors – Jezups, video klipa autors – Valters Murāns. Klipā pīsadola Kvāps, Alex Fox, Deriktors i Vītnīks. Dzīsme īraksteita Ausmeņa Records studejā. Kai atkluoj Ausmenis puorstuovi, dūma par klipa taiseišonu roduos streida laikā: streids ruodīs asūt bejs par tū, ka klipu navar sataisiet 3 stuņdis pyrma viļcīna, nu beiguos – pasaver i saguoja!

„Ausmeņa Records” ir cylvāku apvīneiba – rēzeknīši, kas ir hip-hop kulturā  – reperi, breakdance doncuotuoji, grafiti muokslinīki, bītmeikeri, dizaineri ci kaidi cyti ļauds, kam ir kaida saisteiba ar itū kulturu i kuri rauga dareit sovu lītu kvalitativi i rodūši. Kai jī poši soka – tei ir sova kompaneja bez nūteikta sastuova.

Karteņa – stopkadrs nu klipa.