Itymā vosorā Latgolys entuziastu grupa „BILDIS” centeigi struoduojuse fiļmiešonys laukumā, kab 2013. godā iz lelajim ekranim varātu īraudzeit kinu „Vīna vosora deļ vysu”, nu niu vajadzeigs Tovs atbolsts, kab tys eistynuotūs.

Kab padareitu kinys piecapstruodis dorbus – montiešonu, skona īraksteišonu, kinys muzykys radeišonu i sasagataveišonu kinys pyrmizruodei – drupeit datryukst finansialajā vaicuojumā, deļ tuo aicynojam atbaļsteit Latgolys entuziastu grupu „BILDIS” Lobūs dorbu bolsuošonā, kurymā novembra mieneša golā vysu atbaļsteituokī projekti sajims praseitū finansialū atbolstu.

Bolsuot par kinys „Vīna vosora deļ vysu” komandys dasacejumu var da 30. novembram – gon ar bezmoksys eiszinis paleidzeibu, gon nu draugiem.lv profila. Vaira verīs i atbolsti ite: http://www.labiedarbi.lv/lv/balso_par_projektu/Spelfilmas-Vina-vosora-del-vysu-pecapstrades-nodrosinasana.html

Kina „Vīna vosora deļ vysu” ir myusu dīnu drama, kas stuosta par vīnkuoršu latgalīšu saimi, taidu pošu kai daudzejis niu Latgolā i Latvejā. Kinys varūņus skuoruse itam laikam tik īrostuo i tik suopeiguo problema – izceļuošona iz uorzemem, aizīšona nu dzymtuos sātys i saimis. Nazkod tyvu cylvāku dzeivis vaira nikod naīs pa vacam, atškierteibys laikā kotram ir izaveiduojuse sova pīredze i dzymušys sovys vajadzeibys i sovys nuokūtnis cereibys. Kinys centrā ir palicieju i aizbraucieju sasatikšona Latgolys sātā, tei ir atškireigu pīredžu i vajadzeibu sasadūršona. Kotram ir sova dzeive i sovs redzīņs iz lītom, tok, kab varātu sadzeivuot, ir juopījem cytu cylvāku izvēlis i tys par reizis nimoz nav tik vīglai i izdorams. Kotram sova dzeive, tik vosora deļ vysu vīna – laiks, kod raudzeit sasatikt i naizaškiert iz myužu.

Kinys režisors ir Edgars Blinovs (Latgolys entuziastu grupa BILDIS), vaira zynoms kai kinys „Latgolys laikadečs” (2011) režisors. Fiļmiešona vysys vosorys garumā nūtyka Rēzeknis nūvoda Ūzulainis pogosta Pauleņūs, Ruņču sātā.

Vaira par kinu skaiti: https://www.lakuga.lv/2012/09/11/vina-vosora-del-vysu/

Vaira par Latgolys entuziastu grupu „BILDIS” i juos projektim: http://bildis.blogspot.com/