Folklorys kūpa „Rūtoj” 8. decembrī 17.00 aicynoj iz 10 godu jubileja koncertu Preiļu kulturys nomā.

„Myusu kūpys nūsaukums viestej par vosorys saulgrīžu laiku, kod doba ir pylnā zīdu i reibynūšu smuordu plaukumā, kod vyss tīcās augt, pajimt nu saulis i zemis spāku, energeju, lai augtu i nūbrīstu, taišni taipat kai kūpys dalinīki, kas ir sovā skaistajā jauneibys plaukumā, kurim pasauļs atver sovys apvuoršņus, bet lai tymūs naapsamaļdeitu, kruojam zynuošonys, kū myusu seņči atstuojuši myusim, i mes tuoļuok tuos nūdūsim sovom nuokamajom paaudzem,” tai „Rūtoj” nūsaukumu i folklorys kūpys vadmotivu raksturoj vadeituoja Ilze Rožinska.

Dūma par folklorys kūpys izveiduošonu Preiļu Valsts gimnazejā rodusīs pyrms 10 godim tūreizejam direktoram Juoņam Egleišam (Jānim Eglītim), gatavojūtīs školānu apmainis projektam ar Sūmeju. Ideju jau 10 godus eistynoj „Rūtoj” vadeituoja Ilze Rožinska – Preiļu Valsts gimnazejis muzykys školuotuoja, i gimnāzisti. Niu folklorys kūpā dorbojās 24 jaunīši, pavysam ir bejuši vysmoz 93 daleibnīki.

Folklorys kūpa struodoj ar materialu, kas vuokts Preiļu, Juosmuižys, Vuorkovys, Gaļānu apleicīnēs. Daleibnīki dzīd, doncoj, īt rūtaļuos, stuosta, spielej dažaidus instrumentus, pīvadumam, kūkli, dūdys, stabuli, skripku, kontrabasu, akordeonu, bungys i cytus. „Rūtoj” kotru godu īt čyguonūs i svietej saulgrīžu nakti 21. junī, kurā par tradiceju klivuse apdzīduošona – meitys pret puišim (vysmoz 2 stuņdis nu vītys).

„Rūtoj” vysu laiku aug i atsateista. Ilze Rožinska aicynoj daleibnīkus vuiceitīs nu kotrys dzīsmis, kotra vuorda, lai varātum sadzierdēt, saprast i cytim pasnīgt viestejumu, pajimt vierteigū nu kotra satyktuo cylvāka. Godu gaitā daleibnīkim ir bejus īspieja satikt daudzys Latvejis folklorā nūzeimeigys personeibys, kolektivus, nu kurim giut zynuošonys, īmanis, prasmis i īdvesmu, pīvadumam, Māra Mellēna, Ernests Spīčs, Zane Šmite, Anda Beitāne, folklorys kūpa „Ceiruleits”, ”Auļi”, Rīgas Danču klubs i daudzi cyti.

„Rūtoj” ir prīciejuši Preiļu Valsts gimnazejis i Preiļu gostus nu cytim Latvejis nūvodim i uorzemem, ruodūt Preiļu apleicīnis tradicejis, pīsadalejuši Dzīšmu svātkūs, dažaidūs folklorys saītūs i festivalūs, tymā skaitā „Baltica”, sajāmuši atzineibu i augstus nūviertiejumus dažaiduos skatēs.

10 godu jubilejai par gūdu „Rūtoj” gatavoj svātku koncertu. Tuo veiduošonā aktivi īsasaistejuši ari bejušī daleibnīki, vacuoki, PVG školuotuoji. Svātki tyvai – decembra 8. dīnā 5 stuņēs pi vokora Preiļu kulturys nomā.

Par „Rūtoj” gaitom vairuok vari uzzynuot, apmeklejūt sātys lopu: rutoj.pvg.edu.lv

Sagatavieja Vita Briška