Vēļ tik da 10. decembram Preiļu golvonajā bibliotekā apsaverama žurnalista, dzejnīka i muokslenīka Ontona Rancāna (1933-2009) rodūšūs dorbu izstuode „Zam Latgolys drūsuo spuorna” (Zem Latgales drošā spārna) nu muzeja kruojuma.

Izstuodē apsaverami akvareli, reprodukcejis nu Ontona Rancāna 1952. goda skiču albuma taidā veidā, kai itū albumu beja īkuortuojs pats autors, taipat apsaverami ari tyva O. Rancāna drauga i dūmubīdra Pītera Gleizdāna draudzeigī sarži.

Ontons Rancāns dzims 1933. goda 19. augustā Rogovkā. Bierneiba paguojuse Ičys upis krostūs, tys nūteics pseidonima izvēli i sovā ziņa ari pasauļa izjiutu. Beidzs Nautrānu vydsškolu i LVU Filologejis fakultati. Kai žurnalists struoduojs Kuorsovā, Ludzā, Preiļūs. Preiļūs dariejs organizatorisku i redaktora dorbu presis izdūšonā. Latgolys lauku kulturys kompleksa „Jōsmuiža” izdevnīceiba juo vadeibā izdavuse vaira kai desmit gruomotu, bet nu 1995. goda – Latgolys nūvoda gazetu „Zemturis”, kas piec Rēzeknis Latgalīšu kulturys bīdreibys i V.E. veiskupa Juoņa Buļa īrūsmis kliva par bazi Rēzeknis – Aglyunys diecezis izdavuma „Gaismas Taka”, kur Ontons beja gon žurnalists, gon saliciejs – maketietuojs, gon redaktors.

Sovys emocejis pauds dzejā, kū jis paraksteja kai Onte Leičujōņs.

Onte – taitod Ontons. Antons, dzimis un audzis pi Ičas upes leičim, a ūtrys vōrds – Jōņs, styprynōtais, kūpā iznōk Leičujōns. Dzeivī  Rancāns…
Pi dzejūļim pīsasāstu, kod ir izdeveiba kū nūpublicēt, rakstiet sōku vydusskūlā Rogovkā (Nautrānūs), ka nikas napaleidz, pats arī kū uzzeimeju.
A. Rancāns

Dzejūļus publiciejs vairuoku rajona gazetu slejuos, Preiļu nūvoda dzejnīku kūpys kruojumā „Avota ūdens malks”, tī puorstuovāts ar 29 dzejūlim (kas papyldynuoti ar poša autora ilustracejom).

Nu 1976. goda dorbuojīs Preiļūs, gon kai žurnalists, gon IU „A. Rancāna izdevniecība”, Latgolys Lauku Kulturys centra izdevnīceibā.

O. Rancāns bejs ari vīns nu zemessardzis dybynuotuojim, 1991. godā īsastuoja 25. Preiļu Zemessardzis balatjonā. Par Vaļsts drūseibys styprynuošonu sajiemis apbolvuojumus: medali par Latvejis Bruņuotūs spāku atteisteišonu, Latvejis Vaļsts Aizsardzeibys fonda „Lāčplēsis” gūda zeimi i LR Zemessardzis 35. bataljona gūda zeimi.

Mirs 2009. godā i paglobuots Preiļu kopūs.

Preiļu golvanuos bibliotekys dorba laiks – pyrmūdīnem da pīktdīnem 10.00 – 19.00, sastdīnem 10.00 – 17.00.

Informaceja nu Preiļu nūvoda sātyslopys