Nazynu deļkuo
Nu grīstim nūpilieja
Speiteigs „deļtuo”
I vēļ ilgi leja.

Beidzūt kaids pavaicuoja myusim myusu vīdūkli! I tī, kas vaicuoja, bejom mes poši. Tīši, truopeigi, nasaudziejūši vaicuojumi. Kurom atpakaļ var dūt tīši taidys pošys atbiļdis – truopeigys i nasaudziejūšys. Statistika ruoda, ka šaidi vaicuojumi pamatā teik uzdūti ratai, klusynuotā bolsā, čukstus voi pi sevis, bīži viņ tyvojūtīs aizīšonai. Tai jī izskaņ dūmuos voi melodejā, atsasyt skaņa – dzierdama voi tikai nūjaušama – pret grīstim, aizkarim, greidu. Kas jau tajā briedī apliek atsarūn. A varbyut atsasyt pret snīgpuorslu, pret saulis spaitu, pret vieja naradzamū spuornu. Daba taitod ir vīna lela vaicuojumu kruotuve i atbilžu devieja. I juos atbilde skaņ: ”Es nasarodu poša nu sevis. Taipat ari jius.”

Taidom lelom acim veramīs pasaulī. Pīroduši jau dzeivuot. Navaram pīrast nūmiert. Kū par tū soka „The Secret”? Kū par tū pasceis „Cosmopolitan”?

Aizsnyguse starka lygzda. Voi jis ari aizbrauce iz uorzemem? Tīpat aizsoluse paradize. Pādejī paradizis uobuleiši kaidam putineņam par prīcu. Kaids putineņš kaidam kačeišam par prīcu. Taida kiede. Cylvāks pa vydu. Radeibys krūņs. Bet ja nūteik kars i inkvizicejis, tod vaineigs palīk Dīvs. Kurs golu golā vysu nūsoka? Tei ir vīna lela atbiļde. Kas atsasytūt sīnā sabrucynoj sātu. Atsasytūt snīgpuorslā izraisa lavīnu. Atsasytūt sirdī? Izsauc „Delfi/Tvnet” komentarus. Deļkuo pasauļs taids īvaiņuots? Varbyut eitanazeju pīduovuot?

Numīrynuosim pasauli lobuok. Zili dabasi i dzoltona sauleite. Kai bārni parosti zeimej, pošā lopys styureitī. Zaļa zuoleite voi bolts snīdzeņš. Pučeitis, taurineiši. Rūku, rūkā, „Kas dārzā?”. Juosamuoca nu jauna. Lūžņuot. Kai biteitei. Struoduot kai biteitei. Atrast kaidu. Bet varbyut nalikt sovā vītā? A varbyut tei ir tei paaudžu maiņa? Kaids par mani struodoja, es tagad par jū struoduošu. Pensejis pryncyps.

Prūtams, navajag jau tik pesimistiski i nūsūdūši! Drupeit gaišuoku seju, intonaceju. A vaicuojumi lai palīkt tī poši.

Voi Tu vaicuosi sev? Jau tagad?

_____

“Dūmu pylni pogolmi” ir apzinis plyusma. Maņ pateik, ka es varu izlikt tū, kas vydā, i varbyut kaids cylvāks munūs tekstūs kū atrass. Bīži rokstu par mīlesteibu, bīži par nalaimeigu mīlesteibu, tī vēļ ir taidi ezeiši i vysakas. Laura