Vakar vālā vokorā ar Tihovsku saimis nu Ludzys uzvaru nūsaslēdze LNT šova „Dzīdūšuos saimis” (Dziedošās ģimenes) 4. sezona.

Tihovsku saime šova finala raidejumā dzīduoja divejis dzīsmis – tautys dzīsmi „Skaista mana tēva sēta”, kas itūreiz skanieja latvyski i latgaliski, kai ari Imanta Kalneņa „Vylku dzīsmi”. Jau viestejom, ka šova finalā īklive ari Pavlovsku saime nu Rēzeknis, kas ījēme gūdpylnū trešū vītu. Leidza ar sovu uzvoru, Tihovski vēļreiz pīruodejuši latgalīšu spāku dzīduošonys šovūs – īprīškejā sezonā par uzvarātuojim kliva Puncuļu saime nu Rēzeknis, kai ari cīši veiksmeigs Latgolys saimu starts bejs ari cytuos sezonuos.

„Miļzeigs paļdis vokalajom školuotuojom, kurys kūpā ar myusim beja da gola itymā projektā. Mes uzvariejom, jo myusim beja breineiga komanda, kas paleidzēja vysu padareit,” – tai piec uzvarātuoju paziņuošonys atzyna Tihovsku saime.

Tihovsku saimi šovā puorstuovieja mama Dace, dāls Dagnis i meita Laima. Dace kasdīnā struodoj Ludzys Muzykys pamatškolys bibliotekā, ir folklorys kūpys „Ilža” vadeituoja i dzīduotuoja. Dāls Dagnis, kurs beja idejis autors saimis daleibai šovā, ir cīši aktivs puiss – dzīd „Ilžā”, korī „Austrumstīga”, īt medeibuos, spēlej futbolu, gon īsasaista dažaidūs cytūs projektūs. Dagnis spēlej gitaru, ceitaru, nu muzykys školā vuicejīs akordeona spēli. Niu studej Alberta koledžys Izklaidis industrejis vadeibys i produciešonys nūdalis I kursā. Jaunuokuo meita Laima vuicuos Ludzys Muzykys pamatškolys 4. klasē, spēlej skripku, ceitaru, izteiksmeigi skaita dzejūļus i ir loba stuostneica. Nu agrys bierneibys jei ar mumu īt iz „Ilžys” mieginuojumim i pīsadola koncertūs. Muzykals ir ari saimis tāvs Ainārs, nu jis beja gotovs atbaļsteit sovejūs trokuos idejis, nu pīsadaleit pošā šovā nabeja pīrunuojams.

Sirsneigi sveicam Tihovsku saimi ar uzvaru i vielejam panuokumus ari iz prīšku!

Informacejis olūts – delfi.lv i „Ludzys Zeme”.

Karteņā – Tihovsku saime, publicitatis foto