Daugovpiļs uzjāmums “Dautkom TV” taisa laidīņu ciklu i kinys par Latgolu, raugūt lauzt pastuovūšūs stereotipus i salīdejūt sabīdreibu.

Nacionalūs elektroniskūs plašsazinis leidzekļu padūme (NEPLP) ituo gods 8. oktobrī izsludynuoja konkursu „Par laidīņu taiseišonu regionalajūs i vītejūs plašsazinis leidzekļūs, kas raida televizejis programys, Latgolys regionā”, kura mierkis beja laidīņu latvīšu/latgalīšu volūdā taiseišona Latgolys regionā ar aizdavumim salīdēt sabīdreibu, nūstyprynuot nacionaluos identitatis i vaļsts volūdys pozicejis.

Itūšaļt projekts tyvojās golam. „Natradicionaluo Latgola” (Netradicionālā Latgale) – tys ir 8 kinu cikls, kur kotrys kinys fokusā ir kaida naparosta, atraktiva personeiba. Par Latgolu parosti ir divejaidi, pretieji stereotipi – tys ir depresivs, atpalics regions, kur daudz bezdarbnīku i dzāruoju; Latgola ir keramiku, doncuotuoju i dzīduotuoju zeme. Itymuos kinuos raudzeits paruodeit, ka Latgola ir daudzi plašuoka par itim stereotipim, ka ir palykušys napamaneitys, naakcantātys daudzi cyti lauki, nūtikšonys, cylvāki. Ir sataiseitys i jau paruodeitys kinys par Ivaru Matisovu, Ēriku Začu, Ivaru Magazeini (Juoni Ryučānu), Karinu Lučininu, Džeinu Sauleiti, Mihailu Pupeņu.

Laidīņu ciklys „Austrumu Robeža” – diskusejis ar cylvākim, kuru redzīnī, piec laidīņu taiseituoju dūmom, ir vārts īsaklauseit. Rūbežs – tys nav viņ geografisks i politisks jiedzīņs, tys ir ari Rūbežs cylvāku pruotūs, sirdīs, saskarsmē, pretejūs redzīņūs. Kotram itam laidīņam ir sova tema – religeja, kultura, volūda, politika i c.

Kinys i laidīņus taisa Dautkom Film Studio radūšuo grupa – Sergejs Fridmans, Ivars Utināns, Līga Rudzeite, Valentins Lukaševičs i c.

Vyslatvejis skateituojs vysys kinys i laidīņus var nūsavērt TV kanalā Re:Tv (pīktdinem 17:45 ar atkuortuojumu pyrmudīnem). Planavuots, ka projektā padareitais DVD īroksta formā tiks paduovynuots Latgolys bibliotekom i školom, taipat piec projekta beigu ap janvara vidu kinys i raidejumi varātu byut nūsaverami Dautkom TV portalā.

Informaceju sagatavieja Dautkom TV