Jaunajā šova „Koru kari” sezonā byus ari kors nu Rēzeknis
![Jaunajā šova „Koru kari” sezonā byus ari kors nu Rēzeknis](https://www.lakuga.lv/wp-content/uploads/2013/01/Normunds-Zušs.jpg)
Sagaidūt Dzīšmu svātkus deveņūs raidejumūs nu 3. marta kanalā TV3 septeni dažaidu piļsātu kori izdzīduos sovys meiluokuos i latvīšu tautai nūzeimeiguokuos dzīsmis i miereisīs spākim par īspieju dabuot golvonū bolvu i zīduot tū lobam mierkim.
Itymā sezonā šovā pīsadaleis kori nu Reigys, Lelvuordis, Duobelis, Cāsu, Līpuojis i Latgolys sirds – Rēzeknis. Rēzeknis kori vadeis pārnuos sezonys šlageraptaujis uzvarātuojgrupys „Galaktika” līders i dzīšmu autors Normunds Zušs. Cytus korus vadeis – Reigys lobuo krosta kori – Muora Upmane-Holšteina (grupa „Astro’n’out”), Lelvuordis kori – Aija Andrejeva, Līpuojis kori – Guntis Veits (grupa „Credo”), Duobelis kori – Īva Sutugova, Reigys keiruo krosta kori – Normunds Jakušonoks (grupa „Labvēlīgais tips”) i Cāsu kori – Marts Kristians Kalneņs (grupa „Autobuss debesīs”).
Kotrā korī pīsadaleis 16 jauni i talanteigi dzīduotuoji, kurī puorstuov konkretū piļsātu ci tuos apleicīni. Kotra kora 8 dalinīki dreikst byut jau īprīšk aktivi dzīduojuši jaunīši, nu 8 koru vadeituoji meklēs sovuos piļsātuos. Koru dalinīku pīdzeivuojums byus treis mienešu gars, jo aktivs dorbs pi dzīsmem suoksīs jau februara suokuos i byus da apreļa beigu. Kori tiks gaideits sevkurs dzīduot grybātuojs, nu nadreikst damierst, ka dorbs byus gon vāluos vokora stuņdēs, gon breivdīnuos, deļtuo dalinīkim ir juobyut vysmoz 16 godus vacim.
Atlase iz daleibu Rēzeknis korī byus 31. janvarī nu 17.00 Rēzeknis nūvoda pošvaļdeibys zalā, Atbreivuošonys alejā 95.
Atguodynuosim, ka pyrmajā šova „Koru kari” sezonā uzvarātuoju laurus plyuce Ata Auzāna Daugovpiļs oranžais kors, nu ūtrajā sezonā veiksmeigi pīsadaleja Ilona Bagele i Preiļu ružovais kors.
Vaira par projektu skaiti ITE
Karteņā: Normunds Zušs, ekransuovīņs nu video
Sagataveja: LaKuGa
Komentari