Turpynojās dorbu īsnīgšona jaunīšu bīdreibys „Latgolys Studentu centrs” i latgaliski rokstūšuo medija LaKuGa.lv organizātajam video konkursam „Latgaliskais tevī i pasaulī”.

Ar konkursa starpnīceibu aicynoj lauzt sabīdreibys stereotipus par tū, kaidi ir latgalīši, kai cylvāki dzeivoj Latgolā i kurys vierteibys i lītys teik uzskateitys par latgaliskom. Bīži viņ ziņu sižetūs par Latgolu teik ruodeitys sakrytušys sātys, uzsvārta regiona nabadzeiba i atpaliceiba nu puorejuos Latvejis. Latgolys jaunīši aicynoj puorkuopt puori sovim i sabīdreibys prīškstotim i iz Latgolu i latgalīšim pasavērt nu cyta skotu punkta, atkluot jaunys lītys i vierteibys, tū vysu īmyužynuot video i paruodeit ari puorejai Latvejai, kai ari pasauļam.

Konkursa tema ir „Latgaliskais tevī i pasaulī”, kurū sevkurs konkursa dalinīks var interpretēt piec sovim īskotim. Video var radeit dažaiduos tehnikuos – zeimēt animacejis, veiduot video sižetus ci palyugt, kab par video golvonajim varūnim kliust draugi.

Golvonuo bolva ir duovonu karte 200 Ls vierteibā elektronikys preču veikalā.
Dorbi teik gaideiti da 15. februaram.
Vaira informacejis par konkursu nūlykumā.

Ziņu sagataveja: LaKuGa