Naujenis Kulturys centrā 6. februarī 15 stuņdēs nūtiks latgalīšu kūpys pyrmuo tikšonuos „Sirdī asu latgalīts”.

Ideja par latgalīšu kūpys izveidi īt nu Lociku cīma īdzeivuotuojom Annys Botoris i Terēzis Bulis. Idejis autoru īcere ir apzynuot i apvīnuot Naujenis pogostā dzeivojūšūs latgalīšus, apzynuot i izcelt sauleitē senejuos latgalīšu tradicejis, pīmāram, svātku svieteišonys parodumus latgalīšu saimēs – golda kluošonys i mīlasta pagataveišonys kulturu, telpu nūformiešonu, dzīsmis i daudzus cytus vaicuojumus.

Pyrmajai tikšonuos reizei byus organizatorisks raksturs, nūtiks dalinīku īsapazeišona, pīnuokumu sadale, darbeibys mierķu i aizdavumu nūsaceišona i ari kūpys nūsaukuma izdūmuošona.

Vīns nu pyrmajim latgalīšu kūpys aizdavumim byus gataveišonuos Leldīnem, tiks apzynuotys latgalīšu Leldīņu sviniešonys tradicejis senatnē.

Ziņu sagataveja: LaKuGa