Viļānūs nūtiks ziņģātuoju i stuostnīku vokors „Saimis gūdi”
9. februārī 15 stuņdēs Viļānu kulturys noms jau 11. godu piec kuortys puļcēs ziņģātuojus i stuostnīkus nu Latgolys i Vidzemis iz pasuokumu “Ziņģātuoju i stuostnīku vokors”.
Kai īrosts, pasuokums nūteik februarī, kod Tautys muzykantu bīdreiba sadarbeibā ar Viļānu kulturys nomu reikoj „Ziņģātuoju i stuostnīku vokoru”, iz kuru ziņģēt i stuosteit īsarūn ap 200 dalinīku. Ituo goda tema ir „Saimis gūdi”, kurūs teik dzīduotys na tikai gūda ritualu dzīsmis, bet skanēs ari ziņgis ci saimei nūzeimeigys i paaudzēs montuotys dzīsmis. Taipat stuostnīki itymā godā stuosteis interesantus (pa pusei nūpītnus, pa pusei nanūpītnus) gadīņus, kas nūtykuši saimis svineibu laikā. Tai kai konkursa nūsacejumūs nav atļauts stuosteit literarus dorbus, tod skaidrs, ka vysi nūtykumi tik teišom byus nu dzeivis.
Itymā godā Viļānūs sasatiks ziņģātuoji nu Rēzeknis nūvoda Ūzulainis (folklorys kūpa „Zeile”), Viļānim (lauku kapela „Bumburneicys”), Viļānu nūvoda Dekšārem (kapela „Sovejī”), Kuorsovys nūvoda Saļnovys (muzykantu kapela „Sābri”), Ciblys nūvoda Zviergzdinis (lauku kapela „Saime”), Ludzys nūvoda Isnaudys folklorys kūpa, Modūnys nūvoda Muorcīnys (šļageransamblis „Labākie gadi”) i Borkovys (folklorys kūpa „Madava”), Kūknesis (folklorys kūpa „Urgas”), Lubuona nūvoda Meirānim (tradiceju kūpa „Sietiņš”), Varakļuonu folklorys kūpa i cyti muzykanti. Taipat kotrs stuostnīks Viļānūs tiks sagaideits ar aplausim i ovacejom (itūgod eipaši puorsteigumi teik gaideiti nu Kūknesis trejom stuosteituojom Līvejis Vindelis, Vizmys Kalaus, Māreitis Gražulis). Vyslobuokais stuostnīks byus tys, kurs varēs klauseituojus puorlīcynuot par stuosta patīseibu i spēs sasmīdynuot ikvīnu kluotasūšū, tod var cerēt īgiut vokora skateituoju simpateju bolvu.
Bolvys ziņģātuojim i stuostnīkim ir saryupiejuši gon sponsori i sadarbeibys partneri, gon Tautys muzykantu bīdreiba, pasateicūt Vaļsts kulturkapitala fonda i Viļānu nūvoda dūmis finansialajam atbolstam.
Piec koncerta/konkursa kotrs varēs izlūceit kuojis daņčūs kūpā ar ziņģātuojim.
Pasuokuma programma:
15:00–18:00 Ziņģātuoju i stuostnīku koncerts/konkurss
18:30–19:00 Sumynuošona
19:30 Danči (i mīlasts, ka leidza pajimta „kerzine”)
Karteņa: Borkovys folklorys kūpa „Madava” 2012. goda ziņģātōju i stuostnīku vokorā, Tautys muzikantu bīdreibys arhivs.
Ziņu sagataveja: LaKuGa
