Itūgod dzejneica Marta Bārbale 8. februarī svieteitu 80. jubileju. Par gūdu dzejneicys pīmiņai 8. februarī Murmastīnis Kulturys centrā 15 stuņdēs jai veļteits atceris pasuokums.

Marta Bārbale dzimuse 1933. godā Borkovys pogosta Murmastīnis cīma Skalbjudambjūs zemnīku saimē. Marta vuicejuos Murmastīnis septeņgadeigajā školā, Varakļuonu vydsškolā i 1957. godā beidze Latvejis Vaļsts universitatis Viesturis i filologejis fakultati.

Nu suokuma struoduoja par školuotuoju i bibliotekari Slūkā, vāluok – par redaktori Latvejis Vaļsts izdevnīceibā, bejuse literaruo konsultante. 1960. godā Marta Bārbale kliva par Latvejis Rakstnīku savīneibys bīdri.

Pyrmais M. Bārbalis dzejūļs tyka nūdrukuots 1954. godā žurnalā „Karogs”, bet pyrmais dzejūļu kruojums „Zeme rūgst” izdūts 1960. godā. Vāluok sekuoja itaidi kruojumi: „Arī kadiķi zied…” (1964), „Laimes pakavs” (1967), „Manas miglas” (1969), „Saules pirtī” (1971), „Melni mani kumeliņi” (1979), „Aiz kalna” (1979), „Pa sirmu rasu” (1987), „Tu esi aicināts”, „Dvēselīte mana” (1993), „Ļauj, debestiņ” (1994), „Sūnekļa alts” (2000).

Martys Bārbalis dzejai rakstureiga sirsneiga tonalitate i glaznaina volūda, tū caurvej tyveiba zemei, dobai i lauku dzeivei. Marta ir rakstejuse dzejūļus ari latgalīšu volūdā, tī īkļauti izlasē „Dvēselīte mana”, dzeju publiciejuse ari latgaliskajūs laikrokstūs  „Latgolas Bolss”, „Mōras Zeme” i žurnalā „Jaunō Dzeive”.

Myužeibā dzejneica aizguoja 2003. goda 5. augustā.

ATSAZEIŠONA*

Es vysu myužu porōdā asu
Tev Latgola – zeme boltō.
Kai smogu nostu šu sajyutu nasu
Un navaru atsalīkt stolōk.

Un tōpēc vīnmār pavoda ilgas
Pēc vēja, kas mani syuteis
Pi tovom upem, pi tovom smylgom,
Pi tovu dabasu ryutim.

Tur saule zeimej vyskrōšņōkūs rokstus,
Tur sazeļ zaļsōrti dzīti.
Uz mirkli, kod aizveru gurušūs plokstus,
Es radzu tūs ceļus, kas īti.

Un vysas stygas aizvad pi tevis,
Te vysi povōrdi sylti.
Tys myužs, kū Dīveņš šai saulē ir devis,
Ar tevi, Latgola, piļdeits.

*Saglobuota autoris raksteiba

Roksts taps sadarbeibā ar Riezeknis Centralū bibliotēku

Ziņu sagataveja: LaKuGa