Koč ari 2013. gods jau tai labi īsaskriejs, ir vēļ puora pārnuo goda muzykalī jaunumi, par kurim LaKuGys slejuos vēļ nav viesteits. Tod nu pīduovojam jiusu viereibai muzykalu šaļti ar dzīsmem latgaliski.

Jis

Kas Jis taids ir? Ka suoktu saukt taidus projektus kai „Jis i Jī kam nav bolsa”, latgaliski īskaņuotuos kinys („Maltečka”, „Magņetafonščiks”, „Lykuma draugi” i c.) i multiplikacejis kinys („Začeišu pierteņa”), kas sajiusmynoj vysu Latveju i pīsauktu Guntix vuordu, tod vaira vaicuojumu par Jū navajadzātu byut. Ite pasaklauseišonai koč kas svīžuoks nu latgalīšu underground/alternativuos muzykys lauceņa Juo interpretacejā.

Jis – Krystdāls

Jis – 2M500V (2 metri 500 vepri)

EguceiC

EguceiC (eistajā vuordā Edgars Bikse) ir puiss nu Gaigalovys pusis, kurīs ar muzyku saisteits jau paseņ, koč ari suokumškolys laikūs iz kori īt nagribieja i muzyka nainteresēja – vīneigi klauseitīs patyka. Piečuok suoca spielēt gitaru, pamatškolys beiguos ar klasisbīdrim beja izdūmuojuši kliut par lelim muzykantim, nu vyss tai ari palyka pi idejom. Ar laiku EguceiC īsavuicieja muzykys taiseišonys programu FL Studio, pīsadalieja ar muzyku saisteitūs projektūs, uzlobojūt muzykaluos īmanis i vokaluos prasmis, taipat ari suoca radeit originaldzīsmis ar sovu muzyku i vuordim, kai ari taiseit remiksus cytom dzīsmem.

EguceiC – Himna atkareibai

Patina

Pošuos 2012. goda beiguos atkluoteibā pasaruodeja projekta „Patina” albums „Caur sidraba birzi”. Itys ir pādejais (nikod nikuo navar zynuot, nu vysmoz cikom) projekta albums, kas īraksteits pošu spākim Suomejā, Kirkonumi studejā. Kai soka projekta soliste Biruta Ūzuleņa (Biruta Ozoliņa): „Albums īraksteits lauku vidē pi dobys kryuts, kur meža kozys  brodoj pa dzilū snīgu.” „Caur sidraba birzi” ir projekta catūrtais albums i tys ir nomināts ari Latvejis muzykys īrokstu Goda bolvai 2012 kategorejā „Lobuokais džeza muzykys albums”. Albuma īrokstā pīsadalejuši: Biruta Ozoliņa – bolss, Indriķis Veitners – klarnete, Viktors Ritovs – tausteņinstrumenti, Tālis Gžibovskis – sitaminstrumenti, Oļegs Grišins – bass. Albums gon nabyus dabojams cītā formatā, nu ir planavuots, ka varēs nūpierkt vysmoz mp3 versejā.

Patina – Rūtoj, saule

Dziga

Ite vēļ vīna dzīsme pasaklauseišonai nu kapelys „Dziga” 2012. gada albuma „Gotovs”. Albuma kapela pīduovoj tautys muzyku i dzīsmis, kurom apdaris radejuši kapelys draugi Edgars Lipors, komponisti Ilona Rupaine i Einārs Lipskis, kai ari poši „Dzigys” muzykanti. Vaira par „Gotovs” skaiti ITE

Dziga – Gaišzyluo banteite

Sagataveja: Edeite
Karteņā: Projekta “Patina” albuma “Caur sidraba birzi” motivs