Pi skaiteituojim ir atguojuse Daugovpiļs Universitatis pietneicys Zelteitis Barševskys monografeja „Latgales rotātie dvieļi 20.gadsimtā”. Monografeja ir kulturviesturisks pietejums, kura mierkis ir Latgolys tradicionaluos materialuos kulturys vierteibu apzynuošona, dokumentiešona i saglobuošona nuokušajom paaudzem, par izpietis objektu izavielejūt 20. gs. laikā muojsaimnīceibā darynuotus i rūtuotus rūcinīkus. Pyrmū reizi gruomotys formatā ir apkūpuota kulturviesturiska informaceja par Latgolys tautys muokslā i dzeivisziņā nūzeimeigom, fenomenam pīskaitomom tekstilejom – rūtuotajim aba gūda rūcinīkim, tūs darynuošonys, rūtuošonys i lītuošonys tradicejom nūvodā 20. godu symta garumā.

Pietejums veikts nu 1996. leidz 2012. godam autoris i DU studentu individualūs zynuotniskūs ekspediceju laikā, kai ari papyldynuots ar privatpersonu pīduovuotajom senejom tekstilejom.

Gruomotā „Latgales rotātie dvieļi 20.gadsimtā” autore analizej 118 apdzeivuotuos vītuos Latgolā savuoktūs materiālus, tūs klasificejūt i snīdzūt kulturviesturisku informaceju par 266 rūtuotajim rūcinīkim. Monografejis pīlykumu veidoj plašs i leidz šam napublicāts vizualais materials – 149 ar izšivumim i mežginem rūtuotu rūcinīku fotografejis.

Gruomota izdūta ar VKKF i Latgolys regiona atteisteibys agenturys finansialu atbolstu.

Karteņa: Gruomotys vuoks
Ziņu sagataveja: LaKuGa