Studeja „NPGD” uzjam dokumentalū kinu „Segvārds Vientulis”, kurys pamatā ir Vonogu draudzis katuoļu prīstera Ontona Juhņeviča tragiskuo dzeivis stuosta beigu pūsms, kas nūsarysynuoja Latvejai i Latgolai viesturiski dramatiskūs apstuokļūs. Kinys centrā ir prīstera Ontona Juhņeviča īkšejais konflikts storp gareidznīka morāli ētiskajim uzstuodejumim i patriotisma jiutom, kas līk jimt rūkā īrūci, lai aizstuovātu Tāvzemi i Bazneicu laikā, kod Latgolā atsagrīž padūmu okupacejis režims. Juhņeviču mūceja pretrunys i īkšejs konflikts piec tam, kod beja izavieliejs īsasaisteit partizanu ceiņuos, partū ka partizanu metodis – atrībis akcejis, slepkaveibys i laupeišonys – jam kai prīsteram beja napījemamys. Kinā teik rysynuota ari kolaboracionisma aba nūdeveibys tema.
Kinys filmiešona ituo goda martā nūtiks Vonogūs (Vuorkovys nūvodā), kur puorsvorā nūsarysynuojušs kinā atainuotī nūtykumi, kur gon bazneica, gon bazneickunga sāta ir saglobuojušs sovu autentiskū izskotu. Kinys veiduotuoji aicynoj vītejūs īdzeivuotuojus pīsadaleit masu skotūs, ka viņ jūs kruojumūs ir paguojušuo godu symta pyrmuos pusis apgierbi, apavi i cytys viesturiskys realejis.
Vonogūs planavuots izjimt ainu, kurā nūteik NKVD operaceja pi Vonogu bazneicys, Juhņeviča i partizanu izbiegšona, kai ari meža ainys.
Vonogūs Ontona Juhņeviča vuords nu cylvāku atmiņom nav pagaiss – par tū līcynoj pīminis plāksne pi Vonogu bazneicys sīnys, nūruode iz tū Vonogu centrā, ekspoziceja Vonogu pamatškolys muzejā, pīmineklis Augšmuktūs Latvejis breiveibys idejis aizstuovim piec Ūtruo pasauļa kara – Latvejis Tāvzemis sorgu (partizanu) apvīneibys izveiduotuojim, vadeituojim i īdvasmuotuojim.
Kinā tāluos profesionali aktīri – Vairis Piņķis, Vilis Daudziņš, Ieva Aniņa i cyti. Kinu paradzāts īkļaut Latvejis kinoteatru repertuarūs, organizēt specialus kinu seansus Latgolā, pīduovuot tū LTV programmai, interaktivajai televizejis kinu nūmai, kai ari tulkuot angļu i krīvu volūdā, lai varātu tū pīduovuot dažaidūs starptautiskūs kinu festivalūs, Eiropys i pasauļa valstu TV studejom. Paradzamuo kinys metraža ir 52 minoti, i tai juobyut gotovai leidz ituo goda beigom.

Īskots kinā

Karteņa: A. Juhņevičs, varkava.lv
Ziņu sagataveja: LaKuGa