Var drūši apgolvuot, ka Leldīņu začu maratons ir loba tradiceja, kas jau trešū godu tiks organizāta Mežvydūs. Ka gribit vīnuvīt satikt Latgolys Leldīņu začus, braucit 31. martā, Ūtrajuos Leldīnēs, iz Mežvydu kulturys nomu, kur aktivitatis suoksīs jau 11 stuņdēs.

I kai vysys lobys tradicejis, ari začu maratons ar kotru godu pīsaista vairuok interesentu i dalinīku. Itūgod tys nabyus tikai Mežvydu pogosta pasuokums, bet vysa Kuorsovys nūvoda Leldīņu „ūdzeņa”. I kas tū zyna, varbyut vēļ piec goda tei jau byus vysys Latgolys mārūga aktivitate.
Pasuokuma formats palīk namaineigs – začu maratons ir vyscaur izveits ar sportiskom aktivitatem, jautreibu i vajadzēs ari osu pruotu.
Lai pīsadaleitu pasuokumā, ir juoīvāroj vīns nūsacejums – kotram dalinīkam juobyut zača ausim i kuplai lipai.
Apsaveļcit atbylstūši laikapstuoklim, lai kaidys divejis stuņdis drūši varit pavadeit uora apstuokļūs. Ka vajadzeigs, jemit leidza puorkūžamūs i sluopis veļdzejūšūs paleigleidzekļus.
Aicynuoti teik vysi Kuorsovys nūvoda i ari sābru nūvodu īdzeivuotuoji – leli i mozi, saimis i individualisti.
Vysi maratona dalinīki nūslāgumā varēs mīluotīs ar gordu virīni i čaju. Apbolvuoti tiks na tikai mudruokī i veikluokī, bet ari atraktivuokī i drusku vāluokī.
I piec maratona vysi kūpeigi pīsadaleisim svātku koncertā, kur jaunū Mežvydu kulturys noma greidu īdoncuos vysu paaudžu deju kolektivi.

Lēksim kūpā!
Cibric, cibric!

 
Ziņu sagataveja: Leldīņu Začs