Piec goda klusiešonys Vileks nūvoda Upeitis Tautys nomā ituo goda 23. martā iz aļdis vieliešonu kūpsapuļci īsaroda bīdreibys „Latgolys Saeima” bīdri, pīsadaleja tika 7 nu 34 bīdrim. Tūmār vysim beja kū saceit, i tys napuorsteidze. Aizguojušais gods kūpš labi apmaklātuos kūpsapuļcis Rēzeknē nabeja vīgls – lai gon darbeiba tyka turpynuota, bīdreiba naspēja sakuortuot dokumentaceju Uzjāmumu registrā, daļa bīdru jiutās atstumta i vaļde nasaguoja ni iz vīnu vaļdis sēdi.

Sapuļci sasauce i vadeja bīdreibys vadeituojs Andris Slišāns, jis pasaryupēja ari par gostu pacīneišonu, i diveji nu juo saimis pīcim bārnim snīdze eisu i sirsneigu latgalīšu dzīšmu koncerteņu. Tūmār golvonais runuotuojs beja bīdreibys dybynuotuojs i pyrmais vadeituojs, niu Saeimys deputats Jurs Viļums. Atsaverūt iz paguojušū godu, Jurs Viļums suoce ar maju, kod saisteibā ar krīvu volūdas referendumu „Latgolys Saeima” izplateja paziņuojumu par sabīdreibys vīnuoteibu, vāluok jis reagiejs iz viesturnīka J.Jansona izteicīnim par Latgolu, pausts vīduklis par cyttautīšu Latgolys autonomejis ideju – eipaši Daugovpiļs konferencis sakareibā, snīgta interveja radejā „Baltcom”, bīdreiba aicynuoja NEPLP uzjimt Teni.Bikovski kai lūcekli Sabīdriski konsultativajā padūmē, kai ari nūtykušys dažys cytys aktivitatis, tūmār dorbs nabeja vysai aktivs.

Pi saceituo kluotasūšajim nabeja kū pībiļst, i piec eisom diskusejom kluotasūšī nūlēme, ka nu klaidom juosavuica i dorbs juoturpynoj, i vysi beja gotovi aktivi īsasaisteit bīdreibys dorbā. Sapuļcē vysi lāmumi tyka pījimti vīnbaļseigi i par jaunū „Latgolys Saeimys” prīškādātuoju īvēlēja Valdi Labinski, bet vaļdē – Teni Bikovski, Ivaru Loginu. Aināru Puduli i Andri Slišānu, pādejū vāluok vaļdis sēdē apstyprynuoja kai vaļdis prīškādātuoja vītnīku. Jaunuos vaļdis darbeibys termiņš atbylstūši statutim ir divi godi. Pyrmū reizi kūpš bīdreibys nūdybynuošonys vaļdē nasadorbuos tuos idejiskais tāvs Jurs Viļums, kas tagad kai revidents vysu vāruos vairuok nu molys.

 Sapuļcis laikā vairuokkuort nūtyka ari diskusejis par cyttautīšu aktivitatem Latgolys autonomejis vaicuojumā. Tyka apsprīsta jaunuos latgalīšu bīdreibys „Latgaļu Savīneiba” izveide, kurys vadeibā ir vīns nu „Latgolys Saeimys” pyrmuos stuņdis aktivistim Arvids Turlajs. Jurs Viļums tū viertej kai pozitivu atteisteibu, partū ka tagad latgalīši leidzeigi Kūrzemis suitim varēs operēt ar divejim spākim – vīnu māranuoku, ūtru radikaluoku. Sapuļcē tyks izlamts, ka turpmuok vairuok īsaistomi vysi bīdri, tiks organizātys aptaujis, atjaunuota sātys lopys darbeiba i apreļa beiguos nūtiks pyrmuo atkluotuo vaļdis sēde Rēzeknē. Goda beiguos sasaucama plašuoka bīdru sapuļce, īspiejams, pat uorkuortys kūpsapuļce.

Ziņu sagataveja: LaKuGa (zinis olūts: V. Labinskis)