Leivuonā tyka organizāts konkurss „Līvānu novada firmas ēdiens”, aizvadeitajā nedeļā konkursa komiseja viertēja treis konkursā pīteiktuos nūvoda kopejneicys „Gamma”, „Kalnakrogs” i „Sipres”. Konkursa komiseju puorstuovēja Leivuona nūvoda dūmis sabīdriskūs attīceibu specialiste Ginta Kraukle, turisma organizatore Astērija Vucēna, puortikys puorstruodis specialistis Aina Peiseniece i Maija Kulakova, kai ari konkursa idejis autore Latgolys Muokslys i omotnīceibys centra specialiste Silva Podniece. Par konkursa uzvarātuoju tyka atzeits kopejneicys „Sipres” pīduovuotais pamatiedīņs ar drupeit jautru, bet Leivuonam atbylstūšu nūsaukumu „Dubnas un Daugavas akmeņi”. Konkursā uzvariejušais iedīņs ir reivātu guļbu kļockys, piļdeitys ar bīzū pīnu i pasnīgtys svīksta i kriejuma mērcē.

Nu vysim konkursā īsnīgtajim iedīnim „Dubnas un Daugavas akmeņi” vysvairuok atbylda Leivuona nūvoda i Latgolys regiona iedīņu gataveišonys tradicejom. Iedīņa sastuovdalis atbilst Leivuonam piec geografiskuos atsarasšonys vītys, kai ari tuos ir pīejamys katru dīnu cauru godu.

Turpmuok Leivuona nūvoda firmys iedīņa recepte tiks izvītuota Latgolys Muokslys i omotnīceibys centrā ekspozicejis jaunizveiduotajā stendā – Latgolys kulinarais montuojums.

Turpmuok „Dubnas un Daugavas akmeņi” tiks reklamāts ar turismu saisteituos izstuodēs, pasuokumūs i īspīddorbūs, kai ari byus nūbaudams kopejneicā „Sipres”.

Karteņa: LaKuGys arhivs, karteņai ir ilustrativa nūzeime
Ziņu sagataveja: LaKuGa