Apreļa beiguos Vileks nūvoda Medņevā nūtyka Latgolys lauku kapelu skate-maratons, kas itūreiz beja simbolisks kasgadejū garmanis spālātuoju svātku turpynuojums. Zīmeļlatgolā iz lauku kapelu skati itūreiz beja īsarodušys 8 muzykaluos apvīneibys nu Vileks, Rēzeknis, Viļānu i Daugovpiļs nūvodim. Puorejuos Latgolys kapelys sovu muziciešonu atruodieja Daugovpiļs nūvoda Vabalē nūteikūšajūs Tautys muzykantu svātkūs.

Kai atzyna Latvejis nacionaluo kulturys centra Tautys instrumentu ansambļu eksperts Ilmārs Pumpurs, Medņevā beja jam tei prīca redzēt vysys jaunuokuos Latgolys kapelys. Koč ari skatis – maratona golā kotra kapela sajieme viertiejumu pakuopis veidā, Pumpurs atzyna, ka tei ir klaida, ka juoviertej lauku kapelu snīgus. Tautys muzyka nabyutu juoviertej – kotrs, kas tū spielej jau asūt vierteiba poša par sevi. Žurejis komisejis sastuovā beja ari komponists Raimonds Tigulis, kurs atzyna, ka jam itei ir jauna pīredze.

I pakuopis diplomus itūreiz sajieme Veiksnys pogosta kapela „Aizezere”, Vileks folklorys kūpys „Atzele” muzykanti, Meņevys folklorys kūpys „Egle” kapela, Daugovpiļs nūvoda Naujenis Muzykys i muokslys školys vokali instrumentalais ansamblis i Rēzeknis nūvoda lauku kapela „Malta”. II pakuopis diplomus sajieme Viļānu nūvoda Dekšāru kapela „Sovējī”, Bierzpiļs pogosta kapela i Žeiguru kulturys noma kapela „Ilgas”. Vysom kapelom byus vareiba pīsadaleit XXV Dzīšmu i XV Dzigu svātkūs nūteikūšajā „Tautys muzykys ansambļu maratonā” Viermanis duorzā Reigā 5. julī.

Kapelu repertuars beja dažaids – suocūt nu latgalīšu tautysdzīsmem, klasiskajom dažaidu laiku ziņgem i beidzūt ar jaunuokajim nūvoda i Latvejis šlagergobolim. Kai piečuok sprīde skateituoji – piec kapelu repertuara var pasceit, kurys ir ituos šaļts popularuokuos dzīsmis. Vīna nu taidom izaruodeja ari Igauņu saimis dzīduotuo „Muna sīva”.

Tradicionali apreļa pādejuo sastdine Medņevā ir tautys muzykys svātki – daudzus godus ite nūteik garmanis spālātuoju sasatikšona. Taipat i itūreiz skateituoju vydā beja daudzi nu Vileks nūvoda tautys muzykantim i, kai atzeimuoja Medņevys tautys noma vadeituoja Skaidreite Šaicāne, jai ir lela prīca, ka vysuos Vileks nūvoda kapeluos garmane ir atroduse sovu stabilū vītu tautys muzykys instrumentu vydā.

Koč ari poši mednevīši napīsadaleja skatis programā, vys tik koncerta golā tyka izsaukti iz skotuvis, prīcejūt saguojušūs interesentus ar ļusteigom dzīsmem i energisku garmanis spieli.

Eipaša itei sastdīne Medņevā izavierte ari ar tū, ka tymā dīnā dzeraunē gasteja TV3 ziņu moderators i žurnalists Arņs Krauze. Jis atzyna, ka itys vokors bejuse nabeidzama energeja treju stuņžu garumā.

Golā tik gribīs pīraksteit vuordus, kurus saceja Bierzpiļs pogosta kapelys vadeituojs Jurs Stepanovs pyrma kaidys dzīsmis: „Kas beja pyrmais? Vysta voi ūla? Pyrmuo beja mīlesteiba!” Tai i tautys muzykā – nu suoku ir tei mīlesteiba iz muzyku, tradiceju i sovu instrumentu.

Sagataveja: Edeite
Autoris kartenis