Preiļu Kulturys centrā apreļa beiguos etnografiskais ansamblis „Naktineica‟ atzeimēja sovu 60 godu darbeibys jubileju i īskandynova sovu pyrmū muzykys albumu „Seju, veju, ralallā!‟. Pasuokumā beja i koncerts, i svātku goldi, i lusteigi daņči i balle.

Koncerta pyrmajā daļā Saunys etnografiskais ansamblis „Naktineica‟ klauseituojim pīduovuoja sovys skaneiguokuos dzīsmis i izdzīdova eistynys Saunys pogosta sīvītis dažaiduos emocejis ― prīcu i skumis, puorlīceibu i izmisumu, kai ari cereibu, ticeibu, nūjautu, spāku, mīlesteibu i pīdereibu sovai vītai. Ansambļa daleibnīkim ari lela prīca par niule kai izguojušū jūs pyrmū aļbumu „Seju, veju, ralallā!“, kuru sadarbeibā ar Edgaru Skrāgi īraksteja jau pārnuo goda nūgalē, īkļaunūt tymā 13 dzīsmis. Nūsaukuma izvēlē lela lūma itūreiz ir folklorai par ansambli ― tautā tys tics saukts par Seju, veju ansambli aiz tuo, ka cīši bīži asūt dzīdovuši dzīsmi, kurā ir taids pīdzīduojuma suokums. Taidu humoru jau naasūt kuo turēt kai sveci zam pyura, juolīk tik lītā.

Pasuocīņa ūtrajā daļā izskanēja „Naktineicys‟ gostu apsveikumi i ansambļa draugu kolektivu prīšknasumi. Gostūs beja atbraukuši i uzastuoja Gaļānu pogosta foklorys kūpa „Vydsmuiža“, Preiļu nūvoda Kuļturys centra Folklorys ansamblis „Leiči“, Preiļu Vaļsts Gimnazejis folkorys kūpa „Rūtoj“, Rībeņu Kuļturys noma etnogrāfiskais ansamblis „Jumaleņa“, Saunys Tautys noma līnejdeju kolektivs, Vuorkovys nūvoda folklorys kūpys „Dzeipurs“ i „Vecvārkava“.

Jubilejis reizē eipaši tyka gūdynuots ari „Naktineicys‟ ilggadejais vadeituojs Juoņs Teilāns, kurš ansambļa vadeišonai veļtejs 45 godus nu 1966. da 2011. godam. J. Teilānam tyka padūts ari Latvejis Nacionaluo Kuļturys centra atzineibys roksts. Centra Tradicionaluos Kuļturys eksperte Gita Lancere ari sveice ilggadejuos ansambļa daleibnīcys ― Mariju Briņķi, Lailu Vilcāni, Aigu Anspoku, Annu Vutnāni, Eleonoru Dolģi, Francišku Luriņu, kai ari tagadejū ansambļa vadeituoju Anitu Fedotovu. „Naktineicai‟ loba vieliejumus saceja i ar duovonom īprīcynova ari Preiļu nūvoda dūmis, Preiļu Kulturys centra i Prīkuļu pamatškolys puorstuovi.

Saunys etnografiskajam ansambļam „Naktineicys‟ ir īvārojama prīškviesture, tys ir unikals kolektivs, kas jau vairuokuos paaudzēs ir saglobovs Saunys pogosta Anspoku sīvu dzeivisziņu i dzīsmis. Jubilejis koncertā beja dzierdams i radzams, ka ansambļam ir potencials i resursi restaurēt pat sešbalseigū dzīduojumu, ar kuru legendars beja pyrmais kolektīva sastuovs.

Sagataveja: Anna Briška

Kartenis:

1. Saunys pogosta etnografiskais ansamblis „Naktineica“. Foto: Gunārs Vilcāns.
2. „Naktineicys“ kapela, eipašais gosts koncertā ― ilggadejais vadeituojs Juoņs Teilāns (spielej akordeonu). Foto: Gunārs Vilcāns.
3. Centrā „Naktineicys“ dzīsmu teicieja Eleonora Dolģe, pa labi Olga Zepa. Foto: Gunārs Vilcāns.
4. Etnografiskajā ansamblī sasateik vairuokys paaudzis. Foto: Gunārs Vilcāns.
5. Saunys pogosta etnografiskais ansamblis „Naktineica“. Foto: Armīns Bernāns.
6. Iz vērtivis. Foto: Armīns Bernāns.
7. Aļbuma izdūšonys dorba grupa. Nu kreisuos: kuļturys menedžmenta centra „Lauska‟ vadeituojs Jurs Zalāns, aļbuma izdūšonys projekta vadeituojs, Saunys pogosta puorvaļdnīks Raimonds Rubins, projekta tehniskuo izpiļdeituoja Jadviga Ciša, „Naktineicys‟ vadeituoja Anita Fedotova. Lobajā pusē koncerta vadeituoji Edmunds Strods i Laila Vilcāne. Foto: Armīns Bernāns.
8. Rībeņu Kuļturys noma etnografiskais ansamblis „Jumaleņa“. Foto: Gunārs Vilcāns.
9. Vuorkovys nūvoda folklorys kūpa „Vecvārkava“. Foto: Gunārs Vilcāns.
10. Gaļānu pogosta foklorys kūpa „Vydsmuiža“. Foto: Gunārs Vilcāns.
11. Saunys Tautys noma līnijdeju kolektivs. Foto: Gunārs Vilcāns.
12. Vuorkovys nūvoda folklorys kūpa „Dzeipurs“. Foto: Gunārs Vilcāns.
13. Preiļu nūvoda Kuļturys centra folklorys ansamblis „Leiči“. Foto: Gunārs Vilcāns.
14. Preiļu Vaļsts Gimnazejis folkorys kūpa „Rūtoj“. Foto: Gunārs Vilcāns.