Pyrms nedelis sovu pyrmizruodi pīdzeivoja latgalīšu amatīrkina „Vīna vosora deļ vysu”. Raidejumā gostūs ir kinys golvonūs lūmu tāluotuoji – Arturs Butkevičs i Olga Jermakova. Sarunu voda raidejuma producente Daira Kokoreviča.
Dzeivē jī kotrs dora pavysom cytys lītys, a kinā īguoja caur kastingu. Intervejā dzierdēsit, kai topa ”Vīna vosora deļ vysu”, kaidi ir Olgys i Artura tāli i par kū byutu juoaizadūmoj kinys skateituojim.

Guna Zvīdre reportažā stuosta par pīcu bārnu mamu bieržgalīti Meldru Gailāni i juos jaunū puorsoku gruomotu.
Kotru godu, kod svietejam Mameņu dīnu, bārni ar duovaneņom i puorsteigumim prīcej sovys māmys i soka jom paļdis par ryupem i mīleibu. Bieržgalītei Meldrai Gailānei ituos ryupis niu juopareizynoj jau pīckuorteigi, tok pīcu bārnu mameņa atziest, ka ari mīleiba pīaug ar kotru atlasi. Itūgod pavasarī Meldrai pīdzymuse jaunuokuo meiteņa Irbe Bārbala, sovukuort jau paguojušuo goda beiguos izguojuse ari Meldrys pyrmuo gruomota – puorsokys bārnim. Sižetā dzierdēsit interveju ar pošu Meldru, kaidu vuordu pasaceis ari juos vacuokuo meita i leluokais paleigs vysūs dorbus – Madara.

Par vuordineicu itūnedeļ atbiļdeiga Ilze Sperga. Jei pastuosteis, kai pavasars pīveice vaidus.

Zinis eisumā

Leivonūs nūdybynuots Vydslatgolys Puornūvodu fonds, juo dybynuotuoji ir 22 fiziskys personys – uzjiemieji, zemnīki, pošvaļdeibu i sabīdriskī darbinīki nu Leivuonu, Preiļu, Aglyunys, Vuorkovys i Rībeņu nūvodu. Fonda mierkis ir sekmēt vītejuos kūpīnys izaugsmi, izkūpt zīduošonys tradicejis i finansiali podturēt vītejūs īdzeivuotoju iniciativys. Svareiga asūt ari vītejuos sabīdreibys aktiviziešona pozitivam kūpeigam dorbam, kab lauki napalyktu tukši, kab jimūs dzeivuotu saimis ar bārnim i jaunīši. Vidsyatgolys Puornūvodu fonda dybynuošonys iniciativa dzymuse pyrms goda, kod Preiļu rajona partnereiba īgiva Borisa i Inārys Teterevu fonda atbolstu vītejūs īdzeivuotuoju forumu ci darbneicu organiziešonai.

Itymā pavasarī dzīduotuoja Guntra Kuzmina ir saguoduojuse vairuokus jaunus muzykalus dorbus. Muotis dīnā Guntra sovus klauseituojus jau ūtrū godu piec kuortys īprīcynuoja ar eipašu muzykalu veļtejumu – dzīsmi “Mozai dvēselei mozajā pasaulī”, teksta i muzykys autore ir poša Guntra. Kūpā ar kolegi nu grupys “Borowa Mc” i projekta “Sovvaļnīks” Ingaru Gusānu sataiseits duets “Poparts”, kas apreļa beiguos atruodeja pyrmū projekta dzīsmi “Mana sirds”. Taipat ar sovu īprīškejū singlu “Tik tikko nojaušams” Guntra sekmeigi turpynoj daleibu Latvejis Radejis 2. programys raidejumā “Muzykaluo banka”.

Latgolys Kulturys centra izdevnīceibā tkuortuoti izdūta viļuonīša Vladislava Zepa gruomota „Latviešu leģionāra gaitas”. 2005. godā itei gruomota izguoja latgalīšu rokstu volūdā i izapeļneja skaiteituoju interesi kai dzeivi apraksteitūs nūtykumu, tai ari bogotuos i vīgli plyustūšuos latgalīšu volūdys deļ. Jaunais izdavums byus pīejamuoks tim, kas kasdīnā latgaliski naskaita. Gruomota ir īviereibys vārta kotram, kas interesejās par latvīšu legiona viesturi i laikabīdru līceibom par jū.

Latgolys Uzjiemiejdarbeibys centrs aicynoj mozūs ražuotojus dasasaceit daleibai izstuodē RIGA FOOD 2013. Izstuode nūtiks nu 4. leidz 7. septembram Kīpsolys izstuožu centrā Reigā. Planavuošonys regioni aicynuoti taiseit regionu stendus, kurūs prezenteitu mozūs puortikys ražuotuojus. Daleiba ir bez moksys, pošim juosadz ceļa i uzturiešonuos izdavumi. Par stenda īkuortuojumu juoguodoj pošim, Latgolys planavuošonys regions nūdrūšynuos goldus, teļts, letis. Dalinīkim juopīsadola nūformiejuma taiseišonā atbylstūši Latgolys lauku temai. Pīsadolūt itamā izstuodē, mozajim ražuotojim tīk dūta īspieja prezentēt sevi, popularizēt sovus produktus, kai ari tiergavuotīs i reikuot degustacejis. Dalinīkim juopīsasoka leidz 30. majam pa e-postu luc@latgale.lv.

Lauku atbolsta dīnasts ir izsludynuojs projektu konkursu “Lauku montuojuma saglobuošona i atjaunuošona”. Leidz 11. juņam var īsnīgt pīsacejumus par kulturviesturiskuo montuojuma, kas saisteits ar lauksaimnīceibu, mežsaimnīceibu, puortykys ražuošonu i apstruodi, saglobuošonu, atjaunuošonu i juos dareišonu pīejamu sabīdreibai. Atbolsta pretendenti ir ar itū jūmu saisteiti muzeji voi pošvaļdeibys, kuru teritorejā ir taids muzejs, kai ari profesionaluos izgleiteibys īstuodis, kas esitynoj atbylstūšūs nūzaru vuiceibu programmys i atsarūn vaļsts aizsorgojamūs pīminekļu saroksta īkļautā i sabīdreibai pīejamā objektā.

Nautrānu pogosta Rogovkā atkluots renovātais kulturys noms. Kulturys noma īskandynuošonys koncertā pīsadaleja Rēzeknis zaļuo pokolnu kūra meitinis, etnografiskais ansamblis „Rogovka”, Rogovkys dramatiskais kolektivs, Nautrānu pogosta jaunīšu deju kolektivs „Troks voi” i grupa „Citronu saldējums”.

29. i 30. majā 19:00 st. nūtiks Austrumlatvejis koncertzālis ci Latgolys viestnīceibys “Gors” atkluošonys koncerts, pyrmajā daļā dzīšmu spēle „Ķēniņmeita. Latgales pasaka”, ūtrajā daļā pīsadaleis Līpuojis Simfoniskais orkestris (dirigents Atvars Lakstīgala), vargaņu spālātuoja Iveta Apkalna, pianists Vestards Šimkus, kai ari cyti gosti. Eipaši atkluošonys koncertam kūpkūrī sovus bolsus savīnuos dzīduotuoji nu Rēzeknis, Daugovpiļs i Cāsu kuorim. Koncertā dzīduos solisti Guntra Kuzmina (soprans), Krišjuoņs Norveļs (bass) i cyti. Piec atkluošonys koncerta 30. majā 22:00 st. Mozajā zalā spēlēs grupa „Big Al & Jokers”.
1. junī 21:00 st. spēlēs latgalīšu grupys „Dabasu Durovys”, „Bez PVN”, kai ari cyti muokslinīki.  2. junī vysai saimei dūmuots muzikals teatra uzvadums „Izlaidums Brīnumskapī”.

28. majā 19:00 st. Reigys Dūmā byus vokaluos grupys „Latvian Voices” koncerts „Rūtoj…”. Vokaluos grupys repertuarā sovu vītu atrodušys ari dzīsmis latgaliski. Vysi ījāmumi nu koncerta tiks atdūti Reigys Dūma jaunuos vitražys sataiseišonai.

Vysi jaunī Rēzeknis i Viļānu nūvoda latgaliski raksteit grybātuoji aicynuoti iz literatu školu „Tievanānu pavasars 2013”. Naformaluos apvuiceibys nūtiks lauku sātā Viļānu nūvoda Jaunviļānūs nu 6. leidz 9. juņam. Tī varēs apgiut raksteit prasmi i stilu, sasavuiceit jaunus knifus, sasatikt i vuiceitīs nu eistynu meistaru: augstškolu docātuojim i Latgolā atzeitim raksteituojim. Rodūšajuos darbneicuos tiks maklāta īdvasme kai pļovā, pyunē i mežā, tai ļaudīs. Pasuocīņs eistynuots ar  Rēzeknis nūvoda dūmis i Viļānu nūvoda dūmis finansialu atspaidu. Dasacejuma anketu var īluodēt lakuga.lv i jei leidz 1. juņam juoatsyuta iz e-postu lgsc@lgsc.lv.

Raidejuma komanda: Aigars Runčis, Daira Kokoreviča i Ilze Sperga.
Ka raidejums nasuoc skanēt automatiski, tod klausīs ITE.

Fotografeja nu Rēzeknis Augstškolys sātyslopys.
Meldra Gailāne ar meitu Madaru pīsadola Andrejdīnuos.