Junī pi klauseituojim atīs latgalīšu dzīsmineicys i dzīšmu autoris Laurys Bicānis pyrmais albums „Es tikai ļaujūs”. Kai soka poša Laura, albums ir juos vizeitkarte. Kotra dzīsme nas sovu stuostu par tuos autori. Albums sovu nūsaukumu dabuojs nu dzīsmis „Freakin’Out”, kas startēja 2012. goda Eirovizejis atlasis pusfinalā, latgaliskuos versejis.

Albumā īkļautys dzīsmis septeņuos volūduos, jo Laurys aizaraušonu ar muzyku pavoda ari lels iņteress par svešvolūdom. Taipat jaunu skonu dabuojušys dzīsmis, kas dzierdātys projekta „Jauna slavas dziesma 2012” ītvorūs.

Īrokstūt albumu, Laura ir sasadorbuojuse ar muzikim nu latgalīšu pozitivuo roka grupys „Dabasu Durovys”, basgitaristu Valdi Rundzānu nu legendaruos Daugovpiļs rokgrupys „Elpa”, džeza pianistu Aleksandru Blūmi nu Vuocejis i cytim Latvejā pazeistamim muzikim.

Laura sirsneigi pasateic sevkuram, kas paleidzēja albuma topšonā, eipašs paļdis pīsanuok Daugovpils nūvoda dūmei, Višķu pogosta puorvaļdei, Višķu jaunīšu centram „Sapnis” i Daugovpiļs Universitatei.

Ir paradzāti vairuoki Laurys albuma „Es tikai ļaujūs” prezentacejis koncerti – 18. junī 20:00 Daugovpils teatrī, beletus var nūpierkt Daugovpiļs teatra kasē, 20. junī Reigā Latvejis 1. Rokkopejneicā i 26. junī Rēzeknē Austrumlatvejis koncertzalā „Gors”. Albumu nu 18. juņa varēs nūpierkt ari digitali www.doremi.lv

Karteņa: draugiem.lv
Ziņu sagataveja: LaKuGa