Nu 30. juņa leidz 1. septembram LTV pyrmajā kanalā latgalīšu volūdā tiks ruodeits raidejumu cykls „Cytaidi latviskais”.

Puorsteidzūšā kuortā videjais statiskais latvīts, ari latgalīts, vairuok zyna par Senejuos Grīkejis i Rūmys kulturu, franču literaturu ci britu muzyku nakai par latgalīšu kulturu. Voi zinit, ka pyrmuo gruomota latgaliski izguoja 1756. godā. Ka latgaliski ir publicātys tyukstūšys dzejūļu, simtim stuostu, desmitim romanu? Ka palādys sakta iz vīna lata monetys ci upis leikums iz 10 latu banknotis īt nu Latgolys? Ka ite taisa ūgu veinus, restaurej bronzys laikmata apmetnis, pūdnīki taisa servizis dažaidu valstu viestnīceibom?

Latgola ir tyvai, bet reizē ari cīši tuoli. Par Latgolu pastuov daudz stereotipu, parosti preteju: Latgolā volda bezdorbs, alkoholisms, dzeivoj panaivi i kūtri cylvāki; te vysi dzīd i doncoj, ir labesteigi i vīsmīleigi. Pasavērt iz Latgolu cytaiži, izavairūt nu itim pretejim stereotipim. Paruodeit Latgolu vīgli, atraktivi, bet reizē ari dzili i pamateigi. Zynūt, ka navar aptvert naaptveramū, ar puors precizim, suleigim trīpīnim paruodeit cylvākus, situacejis, fenomenus. Itaids treisdaleigs viersmierkis ir 10 videostuostu cyklam „Cytaidi latviskais”. Latgalīši – jī ir tī poši latvīši, tikai cytaidi. Taišni deļtam stuostu serejai ir itaids nūsaukums; tys pajimts nu Valentina Lukaševiča pyrms ostonim godim saraksteita dzejūļa viersroksta.

Raidejumu cykls suoksīs ar „Latgalīšu literaturu”, partū ka daiļliterarura ir sevkurys kulturys mugurkauls, i nūsaslēgs ar stuostu par izgleiteibu, partū ka taišni zynuošonys ļaun saprast, pījimt, nasabeit nu atškireiguo, dzeivuot piec lozunga – na vīnaidi, bet vīnuoti. Raidejumu cykls ļaus dziļuok izprast latgalīšu raksturu, dzierdēt latgalīšu volūdu, īsadzilinuot nūvoda folklorā, lītišķuos muokslys i amatnīceibys daudzveideibā, ļautīs latgalīšu muzykai, tiktīs ar uzjiemeigim i mierķtīceigim cylvākim, apbreinuot Latgolys dobu i pīsaskart religejis lūmai cylvāku dzeivē. Raidejuma veiduotoji cer, ka „Cytaidi latviskais” rūsynuos skateituojus sovūs vosorys ceļūs īkļaut Latgolu i padareis tū tyvuoku kotram skateituojam.

Raidejuma scenareja i idejis autori ir latgalīšu dzejnīks, prozaiķis, pedagogs Valentins Lukaševičs i LTV redakrore Sandra Freiberga, režisoris – Svetlana Rudzīte, Indra Tilaka, operators – Egils Kurpnieks, projekta vadeituoja – Ilze Šadurska.

„Cytaidi latviskais” byus radzams LTV 1. programma kotru svātdīni nu 30. juņa leidz 1. septembrim. Raidejumi 30. junī i 7. julī suoksīs 17:20, bet, suocūt ar 14. juli, – 18:20. Raidejuma atkuortuojumus varēs redzēt pyrmūdīņu vokorūs.

Ziņu sagataveja: LaKuGa piec LTV1 materiala