Apsazynojūt sabīdriskū dūmu, iniciatīvu grupai jau lobu laiku īprīkš rodās puorlīceiba par vajadzeibu izveiduot bīdreibu, kurys uzmaneibys lūkā byutu 1991. goda nūtykumu pīminiešona. Ituo goda 9. julī Latvejis Republikys uzjāmumu registrā tyka īraksteita sabīdriskuo organizaceja „1991. gada barikāžu dalībnieku Latgales biedrības”. Jaunuos organizacejis vaļdē tyka īvālāts S. Gavars, F. Pušņakovs, N. Ļeonovs, O. Šatilovs, J. Džeriņš, E. Viļuma i J. Steiķe.

Par sovim golvonajim mierkim i aizdavumim bīdreiba ir nūteikuse:
apzynuot i apkūpuot zinis par 1991. goda janvara i augusta nūtykumu dalinīkim i vysu turpmuokū darbeibu;
apkūpuot zinis par nūtykumu dalinīku materialū stuovūkli i dūt vajadzeigū informaceju Latgolys pošvaļdeibom, kuru teritorejuos dzeivoj barikažu dalinīki;
organizēt pīminis dīnys sareikuojumus i aktivi tymūs pīsadaleit;
dūt prīkšlykumus pošvaļdeibys īstuodem par pīminis vītu atzeimiešonu i saglobuošonu.

Bīdreibys dorbā teik aicynuoti na tikai barikažu dalinīki, bet ari sabīdriski aktivi, patriotiski nūskaņuoti i, golvonais, dareit varūši īdzeivuotuoji. Bīdreiba sovā pulkā aicynoj ari nu cytim nūvodim leidzeigi dūmojūšūs.
Jaunizveiduotuo bīdreiba jau ir īplanavuojuse pyrmūs pasuokumus – 13. julī nūtiks kūpeigs pasuokums „Pārliecības ceļš” ar Mārupis barikažu dalinīkim.

Ziņu sagataveja: LaKuGa piec „1991. gada barikāžu dalībnieku Latgales biedrības” informacejis