Šudiņ latgalīšu rokgrupa „Dabasu Durovys” atruoda sovu jaunuokū dzīsmi „Biļdis un Skoti”. Tys ir pyrmais singls piec grupys ūtruo muzykys albuma „Styklu Vītā Skaņa” izīšonys pārnuo goda rudinī.

Ar sovu jaunū dzīsmi „Biļdis un Skoti” grupys „Dabasu Durovys” muziki dagrīž viereibu iz tū, ka myusu dīnuos cylvāki tierej sovu laiku navajadzeigom lītom, nu piečuok taisnojās, ka nav laika. Vys tik laiks vysim ir vīns, i mes poša izavālam, kur i cik tū tierēt.

Dzīsmis „Biļdis un Skoti” muzykys i teksta autors ir Arņs Slobožaņins. Īrokstā ir pīsadalejuši grupys „Dabasu Durovys” muziki: Romāns Sladzis (Vokals, gitara), Kristaps Strods (bass), Aleksandrs Tamans (bungys), Egils Kulmanis (tausteni), Arņs Slobožaņins (vokals). Īroksts taiseits grupys sātys studejā, singlu miksejs i māsterejs Armands Treilihs.

Ituo goda vosora grupai „Dabasu Durovys” saistuos ar vairuokim nūzeimeigim koncertim, nu kurim spylgtuokī ir Latgolys viestnīceibys „Gors” atkluošonys pasuocīni Rēzeknē, festivals „Summer Sound” Līpuojā, Daugavpiļs piļsātys svātki i festivals „Tėvo gitara” Lītovā. Tyvyokajā laikā paradzātys uzastuošonys 27. julī Dagdā i 23. augustā Liktiņduorza lobdareibys koncertā.

Vaira par „Dabasu Durovom” verīs grupys sātyslopā: dabasudurovys.wix.com/dabasudurovys.

Sagataveja LaKuGa piec „Latgolys Producentu Grupys” informacejis.
Karteņa – grupys publicitatis materiali.