Bīdreiba „Latgolys Studentu centrs” kotru godu reikoj dažaidus pasuokumus ar mierki saglobuot i popularizēt latgalīšu volūdu, viesturi i kulturu. Jau vaira nakai pīcus godus nūteik literari muzykalais pasuokums „Latgalīts Latgalīša Draugs” aba „LaLaDra”. Itū pasuokumu bīdreiba kotru godu reikoj dažaiduos Latvejis vītuos. „LaLaDra” aizasuoce pots nu seve, kod saguoja kūpā latgalīši – suoka dzīduot, spielēt i skaiteit sovus literarūs dorbus. Pasuokuma atvārtais i vīnkuoršais formats ir sasaglobuojs ari da šudiņdīnys.

Itūreiz, 24. augustā, „LaLaDra” pasuokums nūtyka Raiņa muzejā „Jasmuiža”, kur vīnuvīt sasatyka dažaidi cylvāki nu dažaidom Latvejis vītom, kab kūpeigi pīsadaleitu tolkā, sakūptu muzeja apleicīni i daleitūs ar sovim tekstim i dzīsmem.

Kai Latgolā ir pījamts, leli dorbi juodora kūpā, deļ tam dīnys pyrmū pusi pasuokuma dalinīki veļteja muzeja apleicīnis sakūpšonai. Vysim sūpluok struodojūt, tyka nūjaukts vacais sātmaļs, sataiseitys jaunys puču dūbis, izleidzynuotys celeņu molys, izgrīsti navajadzeigī kryumi i dareiti cyti dorbi, kab muzejs i doba apleik byutu vēļ skaistuoka. Dorbi tyka dareiti ar smaidu sejī i lobom dūmom. Mozgojūt lūgus muzejam, dzejneica Iveta Ratinīka saceja, ka kotram dzejnīkam byutu reizi dzeivē juonūmozgoj Raiņam lūgi.

Piec kuorteigom dīniškom, pasauokuma dalinīki pīsavērse literari muzykalajai daļai. Ar sovom ailem pasuokuma laikā dalejuos dzejneicys Anita Urča i Rita Cvetkova nu Preilim, Rasma Zariņa nu Aizkalnis, Daiga Lapāne i Iveta Ratinīka nu Reigys. Muzykalus prīšknasumus snīdze i aicynuoja runuot par tū, kas suop, dzīduotuoja Džeina Gavare nu Vuorkovys. Kluotasūšūs uzrunuoja Preiļu nūvoda dūmis izpilddirektors Vladimirs Ivanovs, Memorialū muzeju apvīneibys direktore Rita Meinerte, Raiņa i Aspazijas sātys golvonuo specialiste Gaida Jublovska. Atsokūt iz vaicojumim par Raini i puorbaudūt latgalīšu volūdys zynuošonys, ari skaiteituojim beja īspiejis nūpeļneit nalelys balvenis kai ari, nūskaitūt dzejūli, tikt pi latgalīšu gruomotu.

Bīdreiba „Latgolys Studentu centrs” ari iz prīšku taiseis literari muzykalus pasuokumus dažaidos Latvejis vītuos. Taipoš bīdreibys birojūs Daugavpilī, Rēzeknī, Reigā i Jelgovā byus seminari, nūdarbeibys, cyti pasuokumi par latgalīšim svareigim vaicuojumim. LgSC aktualitatēm var sekuot leidza bīdreibys sātys lopā lgsc.lv ci socialajūs teiklūs twitter.com/LgSC i facebook.com/lgsc.lv. I, prūtams, vyslobuok atnuok gostūs iz kaidu nu birojim.

Ziņu sagataveja: LgSC Daugavpiļs birojs
Kartenis: LgSC arhivs