Latvejis Nacionalais kulturys centrs aicynoj tautys lītiškuos muokslys meistarus, stuostnīkus, teiciejus, muzykantus i sevkuru, kam ryup tradicionaluos kulturys vierteibu saglobuošona i tuoļuok nūdūšona, dasaceit sovu iniciativu leidzdaleibai projektā „Satiec savu meistaru!”, kas jau sastū reizi Latvejā nūtiks nu 2014. goda 4. leidz 6. apreļam.

„Satiec savu meistaru!” ir 2009. godā suoktuos Tradicionalūs prasmu školys turpynuojums, kas īkļauts kūpeigā Eiropys projektā „Eiropas amatu prasmju dienas”. Leidzeigi pasuokumi, kur tradicionalūs prasmu zynuotuoji uzjam pi seve muocekļus, vīnlaiceigi nūteik ari Francejā, Spānejā, Itālejā, Beļgejā i cytuos pasauļa valstīs.

Projekta byuteiba ir viesteit plašuokai sabīdreibai par vierteiguokū, kas myusim ir, – cylvāku, juo zynuošonom i prasmem, kas saglobuotys i puormontuotys nu paaudzis iz paaudzi. Pasuokuma forma ir breiva – meistari teik aicynuoti reikuot meistardarbneicys, individualys nūdarbeibys, atvārtuos darbneicys, paraugdemonstriejumus, lekcejis, prīškskaitejumus, koncertus ci dančus, ci ari koč kū cytu.

Projektā aicynuoti pīsadaleit ari Latgolys meistari, kab varātu īpazeistynuot sabīdreibu taišni ar Latgolys regionam rakstureigajom omotu prasmem.

„Satiec savu meistaru!” nūlykums i dasasaceišonys anketa atrūnama Latvejis Nacionaluo kulturys centra sātys lopā.

Ziņu sagataveja: LaKuGa piec projekta organizatoru informacejis
Karteņa: LaKuGys arhivs