Rudiņa laikā, kod vysi uora dorbi beja apdareiti, senejī ļauds pa vokorim sasalaseja kūpā i dareja vysaiduokus rūkdorbus – puiši taiseja stričus, apstruoduoja kūku, mārgys – adeja, izšyva, aude. Taidu atsarasšonu vīnuvīt, dorbu i puorsoku stuosteišonu, meikļu miniešonu sauce par vakariešonu.

Bīdreiba „Latgolys Studentu centrs” (LgSC) aicynoj vysus interesentus pa vokorim īt ar sovim rūkdorbim iz kopejneicu SĀTA, kur sūpluok ar cytim adeit, aust, izšyut.

LgSC jaunīši novembrī i decembrī pa dorba dīnu vokorim reikuos dažaidys darbneicys – vylnys veļšonā, ausšonā, adeišonā, rūtu taiseišonā. Iz rodūšajom darbneicom var īt vysi interesenti – tuos ir par veļti. Vakareišonu laikā tiks stuosteita ari rokstu zeimu nūzeime, aizdūtys meiklis i stosteiti pastuoški, dzīduotys latgalīšu dzīsmes. Vins nu organizacejis mierkim ir saglobuot i atteisteit latgaliskos tradicejis. Senejī omoti, rūkdorbi ir vins nu tradiceju pamatim. Aicynuoti ari cyti rūkdarbnīki daleitīs ar sovom zynuošonom, taiseit sovys rodūšuos darbneicys kopejneicā SĀTA.

Vaira informacejis par rodūšūs darbneicu laikim i tematiku var izzynuot LgSC sātyslopā (lgsc.lv) i latgalīšu ziņu portalā lakuga.lv, kai ari zvonūt iz teleponu 28362243 (Dagneja) i rokstūt iz e-postu: daugovpils@lgsc.lv.