8. decembrī 16.00 Ludzys Tautys nomā i 15. decembrī 15.00 Kruoslovys Kulturys nomā byus īspieja nūsavērt deju izruodi „Zalkša līgava”. Dejis izruodi izdoncuos Tautys deju ansamblis „Līgo”, izruodis autori ir Dace Micāne Zālīte, Juoņs Purviņš, Dāvis Stalts i Īva Tālberga.

Itys ir laiks, kod ļauds vaira nameklej jaunys vierteibys, piec kurom snēgtīs. Rūnas nūjauta, ka spāks ir juomeklej myusu seņču pyurā – tautysdzīsmēs, puorsokuos i senejuos tradicejuos. Deļtuo horeogrāfs Juoņs Purviņš ir izcieļs nu tautys puorsoku par Zaļkša ļaudovu, kūpā ar režisori Dacis Micānis Zālīti, muzykys autorim Dāvi Staltu i Īvu Tālbergu, tārpu muokslineicu Sandru Strēli ir rodusīs dejis izruode „Zalkša līgava”.

„Stuosts ir par jaunys saimis izaveiduošonu, bārnim, kas dzimst mīlesteibā, i izaškieršonu, meklejūt sovu pīdereibu. Zaļkšam i juo ļaudovai ir dažaida izcelsme i atškireigi pasauli – jiura i zeme,” skaidroj izruodis libreta autore i režisore Dace Micāne Zālīte.

Režisore, stuostūt par izruodi, atzeimej, ka izruodis dzeivais nervs ir viestejums, ka napījemams i svešs pasauļs, kuru simbolizej Zaļkts, Zemis meitai, īpazeistūt i īmeiļojūt jaunū veiru, nasadareibu puorvierš sadareibā. Dīviškais Zaļkts savīneibā ar Zemis meitu, diveju pasauļu sasatikšona – gors i matereja, vīns caur ūtru pastuovūši – tie ir saime, tū viestej latvīšu puorsokā īveituo seņču gudreiba.

Deju izruodis idejis i horeografejis autors i TDA „Līgo” muokslinīciskais vadeituojs Juoņs Purviņš atzeist, ka izruode latvīšu skatuvis dejis cīneituojis ir koč kas jauns. „Izruodis taiseišonā ir pīsadalejuši fantastiski ļauds, kotrs ar sovu pīredzi i redziejumu iz myusu dīnuos vysim tik svareigom lītom i simbolim kai latvīteiba, dzimtine, sāta, saime.”

Izruodis „Zalkša līgava” pyrmizruode beja 2011. goda 5. decembrī Latvīšu Bīdreibys sātā, piečuok bejuši koncerti cytuos Latvejis vītuos, nu niu izruodis autori tū gryb nūvest iz tuoluokom Latvejis vītom – Ludzu, Kruoslovu i Bārtu, kab stuostu radzātu ļauds, kam nav vareibys tikt iz Reigu. Novembra suokā izruode beja nūsaverama ari Leivuonā. Golvonū lūmu – Zaļkša ļaudovu izruodē doncoj mārga nu Preiļu pusis – Santa Bivbāne.

Vaira dazynuošonai par koncertim: www.ligo.lv

Ziņu sagatavēja: Marta Vaivode

Karteņā – izruode „Zalkša līgava”, foto J. Tilčiks