Kasgadejā laikroksta “Diena” reikuotajā “Dienas gada balva kultūrā” kategorejā “2013. gada spilgtākais kultūras notikums” sovā storpā sasaceņš divejis itymā godā atkluotys Latgolys kulturys īstuodis: Daugavpiļs Marka Rotko muokslys centrs i Latgolys viestnīceiba “Gors” Rēzeknē.

Nu 2. janvara leidz 2. februaram par nominantim var bolsuot ari laikroksta “Diena” portalā i taidā veidā nūsaceit tautys bolsuojuma favoritus. Bolsuot īspiejams vīnu reizi dīnā par vīnu nominantu kotrā kategorejā.

“Dienas gada balva kultūrā” ir laikroksta tradiceja nu 2001. goda. Bolvys tradiceja nūzeimoj saceit paļdis muokslys personeibom, kas goda laikā vysaiduos intonacejuos īdvasmuojušs i ļuovušs sasajust tyvuok harmonejai i spākam, bet tikpat lelā mārā “kitynuojušs” i ruodejušs prīkšzeimi, kai byut napareizim, dullim, raksteit puori rūteņom.

Itūgod bolva ir kai viļcīņs ar Latvejis kulturys dzeivis 2013. goda spylgtuokajim nūtykumim, kas pīstuoj vairuokuos stacejuos: muzyka, literatura, vizualuo muoksla, kino, teatris.

Ziņu sagataveja: LaKuGa
Karteņa: publicitatis karteņa