Janvarī Rēzeknis zonaluo vaļsts arhiva telpuos apsaverama fotoizstuode “Rāznas nacionālais parks”, bet Rēzeknis nūvoda dūmē, 1. stuova foajē, apsaverama fotoizstuode “Meži un dabas vērtības NATURA 2000 teritorijās”.

Izstuodē „Rāznas nacionālais parks” 30 karteņuos īmyužynuoti dobys skoti, Rāznys azars i Rāznovys paugurainis ainova, teritorejā sastūpamī augi i dzeivinīki, nacionaluo parka īdzeivuotuoji i cytys šaļts eipaši aizsorguojamajā dobys teritorejā. Izstuode topa 2008. godā, kod tyka reikuots fotokonkurss Rāznys nacionaluo parka vierteibu populariziešonai, teirys vidis saglobuošonys idejis aktualiziešonai i rodūšu cylvāku īsaisteišonai vidis izgleiteibys dorbā. Dorbu autori ir nu Rēzeknis, Ludzys, Aizkrauklis, Valmīrys nūvodim, kai ari nu Reigys. Izstuode papyldynuota ar Dobys aizsardzeibys puorvaļdis darbinīku karteņom. Pīcu godu laikā izstuode ir apceļuojuse Rēzeknis, Ludzys, Cyblys, Kuorsovys i Zylupis nūvodus, i niu ir apsaverama Rēzeknē. Izstuodi īspiejams apsavērt leidz 7. februaram, dorba dīnuos nu 8.30 leidz 17.30. stuņdem Rēzeknē, Duorzu ūļneicā 7a, 2. stuovā. Izstuodis apmekliejums ir bez moksys.

Izstuodē „Meži un dabas vērtības NATURA 2000 teritorijās” radzamys Latvejis dobys vierteibys, kas ir nūzeimeigys i Latvejis, i Eiropys Savīneibys i pat pasauļa mārūgā. NATURA 2000 ir vīnuots Eiropys Savīneibys nūzeimis aizsorguojamūs teritoreju teikls i tuo izveide ir vīns nu sugu i biotopu aizsardzeibys nūdrūšynuošonys leidzeklim. Myusu vaļsts teritorejā ir nūteikti 60 ES nūzeimis aizsorguojamī biotopi. Svareigu vītu ījam taišni meža biotopi. Dobys aizsardzeibys puorvaļdis darbinīku karteņuos apsaverami nūzeimeiguokī mežu biotopi, tymūs atrūnamī augi i dzeivinīki. Kartenis papyldynuotys ar eisu biotopu aprokstu. Izstuode byus apsaverama leidz 3. februaram, dorba dīnuos nu 8.00 leidz 16.30 stuņdem, Rēzeknē, Atbreivuošonys alejā 95, 1. stuova foajē. Izstuodis apmekliejums ir bez moksys.

Ziņa sagataveita piec Dobys aizsardzeibys puorvaļdis Latgolys regionaluos administracejis informacejis
Karteņa: „Pavasaris mežā” /A.Stepanova