8. februarī 15:00 stuņdēs Viļānu nūvoda Dekšāru pamatškolys zalā nūtiks XII Ziņgeituoju i stuostnīku vokors, kur itūgod i kolektivi nu Latvejis, i gosti nu Lītovys i Igaunejis skaņdēs krūga dzīsmis i stuostus.

Kotru godu februara ūtrajā sastdīnī ap 200 dalinīku saīt kūpā ziņgeituoju i stuostnīku vokorā, kur ziņgeituoji izpylda 2-3 paaudzēs montuotuos dzīsmis, bet stuostnīki tik tycami stuosta pa pusei nūpītnus, pa pusei nanūpītnus gadīņus nu dzeivis, ka navar eistyn izprast, cik tymūs patīseibys, cik izdūmys. Itūgod pasuokumam izvieleituo tema ir krūga dzīsmis i stuosti, partū vokors nūteikti byus interesns i ļusteigs.

Koč i stuostnīki ir dasasacejuši nalelā skaitā – Elizabete Kudiņa (Preiļu nūvoda Saunys pogosts), Inta Birziņa (Lubuona), Gunta Siliņa (Bauskys nūvoda Vacsaule), Edmunds Packevičs (Modyune) i Jāzeps Garančs (Cesvaine), tūmār nav šaubu, ka izasmīšona garantēta, klausūtīs stuostus par tū, kaidi puorsteigumi gadiejušīs kuozuos voi  ceļā iz krūgu, voi kai nūsaceit, ka krūgā jau dīzgon byuts un laiks īt iz sātu. Vyslobuokais stuostnīks byus tys, kurs nu nīka “izpyuss” lelu nūtykumu.

Sovukuort ziņgeituoji kai īrosts pīsadaleis kuplā skaitā – Dekšārēs kūpskaitā sabrauks 25 ziņgeituoju grupys i individualī izpiļdeituoji. Vairuokys folklorys grupys i ansambli iz ziņģu vokoru īsarūn kotru godu i publika tūs jau ir īmīļuojuse.

Itūgod skateituojus prīcynuos Viļānu KN lauku kapela “Bumburneicys” (vadeituoja Vivita Skurule), Viļānu KN krīvu dzīšmu vokalais ansamblis “Sudaruški” (vad. Laura Reksne), Viļānu nūvoda Dekšāru pogosta lauku kapela “Sovejī” (vad. Janīna Juste), Dekšāru pogosta veiru kūpa “Kūzūls”, Kuorsovys nūvoda Saļņovys kapela “Sābri” (vad.Elvīra Bleive), kapela “Malnavas muzikanti”, Varakļuonu KN folklorys kūpa (vad. Kristīne Strode), Borkovys folklorys kūpa “Madava” (vad. Terēsija Pelša), Preiļu nūvoda Saunys pogosta etnografiskais ansamblis “Naktineica” (vad. Anita Fedotova), Vacsaulis pogosta folklorys kūpa “Vecsaule” (vad. Sarmīte Zandere), Lubuonys lauku kapela “Meldiņš” (vad.Andris Dzenis), Nagļu pogosta ziņgeituoju kūpa “Skreine” (vad. Veneranda Rimša), Zviergzdinis lauku kapela (vad. Valentīna Ruciņa), Izvaltys pogosta folklorys kūpa “Izvoltīši” (vad.Anda Leikuma), Cesvainis folklorys kūpa “Krauklēnieši” (vad.Baiba Putniņa), Aglyunys folklorys kūpa “Olūteņš” (vad. Marta Bicāne), kai ari individualī ziņgeituoji Anita Rutule (Nagļi), Aija Inča i Ināra Pāvulsone (Barkava).

Muzykanti atbrauks na tik nu tyvuokom i tuoluokom Latvejis vītom, bet  ari nu sābru zemem – kapela “Radvija” nu Lītovys i Pērnavys garmanis spielmaņu klubs “Pärnumaa Lõõtspillihaigete Selts“ nu Igaunejis.

Vaira kai desmit godūs ziņgeituoju i stuostnīku vokorūs ir īgiuti i apkūpuoti nūzeimeigi mysu dīnu folklorys tradiceju materiali, kas da goda beigu puortaps informativā izdavumā “Ziņģes un stāsti”.

Ziņgeituoju i stuostnīku vokora  mierkis ir popularizēt mysu dīnu folkloru kai sabīdreibys kulturys sastuovdaļu, veicynuot tautys tradiceju saglobuošonu i puormontuojameibu, kai ari nūdrūšynuot izgleituošonys i pīredzis apmainis procesu storp Latvejis nūvodu i uorvaļstu ziņgeituojim i stuostnīkim. Pyrmū reizi ziņgeituoju vokors nūtyka 2003. godā Modyunis rajona Borkovā.

Ziņa sagataveita piec Tautys muzykantu bīdreibys dūtuos informacejis
Karteņā Rēzeknis nūvoda Ūzulainis pogosta folklorys kūpa “Zeile” Ziņgeituoju i stuostnīku vokorā Viļānūs 2013. godā (karteņa nu Tautys muzykantu bīdreibys arhiva)