Leidz 10. februaram nūtiks Latgalīšu kulturys Goda bolvys “Boņuks 2013” pretendentu izviertiešona, lai jau 23. februarī gūdynuotu 2013. gada snīgumus latgalīšu kulturys dzeivē. Žurejis kūdulu veidoj cylvāki, kuru veikums latgalīšu kulturys dzeivis veicynuošonā jau ir noviertiets ar “Boņuka” bolvu.

Latgalīšu kulturys Goda bolvys “Boņuks 2013” žurejis komandā aicynuoti naatkareigi eksperti i sovys jūmys lītpratieji: Ilga Šuplinska, Anita Ločmele, Ruta Cibule, Ilmārs Dreļs, Andris Slišāns, Juoņs Streičs, Diāna Zirniņa, Ingars Gusāns, Atis Auzāns, Aigars Runčis, Artūrs Uškāns, Sandra Stare, Lolita Greitāne, Guntars Račs, Līga Rundāne, Ilze Sperga, Anna Rancāne, Raibīs (Oskars Orlovs) i Līga Seiksta-Deksne.

Latgalīšu kulturys Goda bolva “Boņuks” radeita ar mierki veicynuot latgalīšu kultūrvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kulturā paguojušuo goda grīzumā. “Boņuks” ir vīneiguo goda bolva, kas eipaši izceļ i gūdynoj sasnāgumus latgalīšu kulturys dzeivē, i itūgod tei tiks padūta jau sastū godu.

Itūgod īvīstys nalelys izmainis nūlykumā i nominacejuos – vairuokys apvīnuotys, bet cytys guojušys kluotyn, pīmāram, pyrmū reizi tiks padūtys bolvys par sasnāgumim vizualajā, audiovizualajā i skotuvis muokslā. Pyrms izveiduot 2013. goda bolvys nūlykumu, Latgolys viestnīceiba GORS aicynuoja sevkuru kulturys draugu paust sovu redziejumu i īsacejumus par bolvys nominacejom, viertiešonu i cytim ar bolvu saisteitim vaicuojumim. Leluokuo daļa redzīņu paudieju atzyna, ka bolvys nominaceju skaits varātu byut mozuoks, rezultatā itūgod “Boņuku” paradzāts padūt 21 nominacejā. “Boņuks 2013” reikuotuoji ir Latgolys viestnīceiba GORS i bīdreibys “Kukuži” i “Latgolys Producentu grupa”.

“Boņuka” bolvu padūšonys ceremoneja nūtiks 23. februarī 16.00 stuņdēs Latgolys viestnīceibys GORS Lelajā zalā. Beletus iz bolvu padūšonys pasuokumu var īsaguoduot Latgolys viestnīceibys GORS i “Biļešu paradīzes” kasēs vysā Latvejā, kai ari škārsteiklā.

Ziņa sagataveita piec Latgolys viestnīceibys GORS dūtuos informacejis