Leidz 19. martam Latgolys Kulturviesturis muzejā (Atbreivuošonys alejā 102, Rēzeknē) apsaverama tradicionaluo bārnu muokslys dorbu izstuode “Saules atspulgi”. Rēzeknis Muokslys i dizaina vydsškolys Muokslys školys audziekni kotru godu ruoda sovu veikumu, itūgod izstuodis dorbūs radzami bārnu atrostī saulis atspulgi i snīgā i latakuos, i pavasara paļtīs i muokuļu zalta maleņuos…

Rēzeknis Muokslys i dizaina vydsškolys Muokslys škola kotru godu reikoj apjūmeigu izstuodi, kab īpazeistynuotu vysus interesentus ar školys audziekņu padareitū dorbu. Te ir apsaverami vysaidu vuiceibu prīškmatu, i niu tik vuiceibys suokušūs audziekņu dorbi, i vysaidu kursu audziekņu dorbi. Ploša izstuodis daļa ir veļteita pādejuos klasis audzieknim, kuri 2012./2013. vuiceibu godā izstruoduoja sovu nūbeiguma dorbu i dabuoja aplīceibys par profesionaluos īvirzis izgleiteibu.

Tī ir i klusuos dobys zeimiejumi, gleznys, i grafiskys kompozicejis, i vysaidu materialu dorbi. Tī ir i zeida šali, i dobys materialu kompozicejis, i burtu grafikys, i grafika iz stykla, i pērleišu dorbi, i dekorativi keramikys dorbi, mozaikys, batikys. Kotrs dorbs atsaškir, tai atkluojūt autoru izdūmys dažaideibu i originalitati.

Izstuodē labi radzama ir izgleiteibys programys apgive kūpumā, audziekņu izaugsme, dorbu sarežgeiteibys pakuopis maiņa. Muokslys školā ir taidi vuiceibu prīškmati kai zeimiešona, gleznuošona, kompoziceja, dorbs materialā, veiduošona, maketiešona, batika, muokslys volūda. Vysi školuotuoji aktivi struodoj i vaicuoj veidus, kai uzturēt audziekņu interesi, kai panuokt rodūši interesantuokus rezultatus.

Izstuode atvārta: ūtardīņ, trešdīņ, catūrtdīņ, pīktdīņ – 10:00-17:00,
sastdīņ – 10:00-16:00, svātdīņ, pyrmūdīņ – slāgta.
Īeejis maksa školānim, studentiem– 0.43€/ Ls 0.30, pīaugušajim– 0,71€ / Ls 0.50

Teksts: Kristīne Binduka, Rēzeknis Muokslys i dizaina vydsškolys Muokslys školys vadeituoja
Karteņa: no RMDV arhiva