6. martā 19:00 stuņdēs kinoteatrī “Splendid Palace” nūtiks Ilonys Brūveris dokumentaluos kinys “Tapieris” pyrmizruode. Kina ir stuosts par Latgolā dzymušū tango karali Oskaru Stroku, golvonajuos lūmuos: Jakovs Rafalsons, Gints Grāvelis, Marija Bērziņa i Andris Bulis. Pyrms seansa muzicēs Gidona Grīnberga instrumentalais ansamblis “Ošers”, solisti Marija Bērziņa, Goran Gora i Laimis Rācenājs, kai ari byus īspieja sasatikt ar golvonūs lūmu atveiduotuojim.

„“Tapieris” ir stuosts par muziki, kas ceinuos par sovu muzyku laikā, kod pasauli puoršalc leluo depreseja – pyrmuo ekonomiskuo krīze. “Tapieris” ir laikmeteiga varūņa prototips – juo myužeigī porodi i naveiksmeiguo uzjiemiejdarbeiba ar namiteigim ceņtīnim atrysynuot finansialuos problemys, sasasauc ar myusu dīnu realitati. Stroks īmontoj skateituoju i kinys veiduotuoju simpatejis ar sovu sapynu par muzyku, naskaitamajim romanim i vysom ar tū saisteitajom napatikšonom,” stuosta kinys scenareja autore i režisore Ilona Brūvere. „Struoduot pi jauna kinys materiala maņ nūzeimoj dūtīs laika, telpys i napīdzeivuotu nūtykumu ceļuojumā, kotru reizi atkluojūt jaunu patīseibu par eistineibu. Ekrans itymā gadīnī ir izzinis projekceja, kuru mes – kinys veiduotuoji – izspieļojam kūpā ar skateituoju.”

Kina sekoj Oskara Stroka veiksmem i naveiksmem natīši bolstūtīs iz Latvejis Vaļsts arhiva dokumentim.  Komponista rodūšuos biografejis kontā ir vaira nakai 300 skaņdorbu, tūmār komponistu savīneibā Stroku uzjam 30 godus piec juo smierts. „Ilonys Brūveris kinā komponista biografejis fakti saplyust ar paguojušuo godu symta suokuma vizualū rekonstrukceju, kas skateituojim dūd īspieju izdzeivuot i izjust Stroka liktini,” tai kinu raksturoj kino zynuotnīks Viktors Freibergs.

Kina radeita ar Nacionaluo Kino centra, Reigys dūmis, Vaļsts Kulturkapitala fonda atbolstu.

Ilona Brūvere 2012. godā sajāmuse bolvu “Lielais Kristaps” par Lobuokū dokumentaluos kinys režiju pilnmetražys kinai “Versija Vera”. Brūveris portretkinys izaceļ ar spylgtu tālaineibu i individualu režisora pīeju kinu varūnim. Golvonuo “Tapiera” operatore Elīna Bandēna ir divkuortieja “Lielā Kristapa” laureate. Skaņu režisori: Ilmārs Piliņš i Jevgēnijs Gobzevs.  Montaža – Guntis Lēmanis. Producents- Artis Rutks.

Beleti iz kinys pyrmizruodi atrūnami “Biļešu servisa” i “Splendid Palace” kasēs.

Vaira par Oskaru Stroku vari skaiteit ite.