Jau dasmytū godu Rēzeknis Augstškolys (RA) studentu teatris “ĶerRA” dūsīs iz Reigys Tehniskū universitati, lai pīsadaleitu 15. Latvejis studentu teatru dīnā, kas nūtiks 22. martā.

Festivala jubilejai par gūdu ituo goda tema ir VIERTEIBYS. Aizpyldūt dalinīka anketu, rēzeknīšim beja juoatbyld iz vaicuojumu: kaidys ir jiusu teatra leluokuos vierteibys? Atbiļde guoja vīglai: tys ir laiks, precizuok, 3 nūzeimeigi tuo cikli, kuri mādz ATSAGRĪZT: jaunrade, kūpābyušona i pošizziņa.

“ĶerRA” truopejuse desmitnīkā ar sovys izruodis vīlys izvieli. Tūpūšū dzejis kompoziceju “Atgriešanās” veidoj latvīšu i latgalīšu teksti ar pazudušuo dāla daudzveideigū interpretaceju nu Bībelis leidzeibys gondreiž nagrūzeita nūlasejuma leidz tuos postmodernajai alūzejai. Bībelis leidzeibys prīškplanā ir pīdūšonys akts, bet misterejis sižets centriets iz atsagrīsšonys ritualu tuo nūskaņu i paviersīņu daudzveideibā. Speciali itam īstudiejumam RA studentu teatra ilggadejuos dalineicys Liene Sergejeva i Linda Bauska ir saceriejušys breineigu dzīsmi, kas skanēs izruodis nūslāgumā.

Mistereja “Atgriešanās” sovā tematikā sasabolsoj na tik ar vīna voi ūtra potencialuo skateituoja personeigū dramatiskū pīredzi saimis attīceibuos, myužeigū vierteibu ceiņu izškireiguos situacejuos, bet ari ar myusu dīnu Latvejis suopeigū kasdīnu – kuplū izbraucieju skaitu, svešumā kleistūšūs laimis vaicuotuoju ciļvieceigū sapynu atsagrīzt sovā sātā.

Ceļojūšuo Sudobra Uoksta capure – studentu teatru festivala golvonuo bolva – 2 godus piec kuortys „gasteja” Rēzeknē, pasuokuma organizietuoji stuosta, ka leidz šam tik ilgstūša Sudobra Uoksta capuris kaviešonuos vīnā vītā nav pīradzāta.

Ziņa sagataveita piec RA Sabīdryskūs attīceibu nūdalis dūtuos informacejis