Izstuodē “2013. gads Latvijas grāmatniecībā” apsaveramys ari gruomotys latgaliski
Leidz 16. majam Latvejis Universitatis Akademiskajā bibliotekā apsaverama izstuode “2013. gads Latvijas grāmatniecībā”, kas pīduovoj īspieju īsapazeit ar Latvejis gruomotizdevieju dorbu paguojušajā godā. Izstuodē puorstuovāta ari Latgolys Kulturys centra izdevnīceiba.
Izstuodē ir puorstuovātys vaira nakai septeņdesmit izdevnīceibys ar apmāram 800 īspīddorbim: gruomotom, brošūrom, kalenderim i cytim dorbim.
Izstuodē vysvaira gruomotu pīduovoj taidys leluos izdevnīceibys kai “Zvaigzne ABC”, “Mansards”, “RaKa”, “Dienas Grāmata”, “Egmont Latvija”, “Jumava”, “LU Akadēmiskais apgāds” i cytys. Taipat apsaverami ari vairuoku regionalūs izdevnīceibu dorbi, pīmāram, Latgolys Kulturys centra izdevnīceiba, Daugovpiļs Universitatis akademiskais apguods “Saule” i cyti.
Gruomotu tematika izstuodē ir vysaida – zynuotniskuo literatura, vuiceibu gruomotys, daiļliteratura, gareiguo literatura, bārnu gruomotys, muokslys izdavumi, foto albumi, kalenderi i cyti, tymā skaitā ari gruomotu muokslys konkursam “Zelta ābele 2013” nominietuos gruomotys.
