30. martā nu 11 leidz 19 stuņdem Rēzeknē nūtiks amatīrteatru īstudiejumu regionaluo skate “Gada izrāde 2013”, kurymā Rēzeknis, Ludzys nūvoda Isnaudys, Bolvu nūvoda Tiļžys i Prīkuļu nūvoda amatīrteatri ruodeis lobuokūs īstudiejumus, puorvieršūt svātdīni par teatra svātkim.

Amatīrteatru skate Rēzeknē suoksīs ar divejom izruodem rēzeknīšu izpiļdejumā – 11 stuņdēs Rēzeknis Nacionalūs bīdreibu kulturys nomā Rēzeknis teatra – studeja “Joriks” pīduovoj nūsavērt Nikolaja Leskova krīvu klasiskuos literaturys uzvaduma insceniejumu – monoizruodi “Sasuku mākslinieks” (režisore Larisa Ščukina) Larisys Beilo snāgumā, bet 12:30 stuņdēs Rēzeknis Kulturys nomā Rēzeknis Tautys teatra akteri Ulriha Hūba lugys uzvadumā “Astoņos pie šķirsta” (režisore Māra Zaļaiskalns) vīglai i ospruoteigai izstuosteis Bībelis stuostu par Pasauļa plyudim.

Izruožu maratonu 30. martā turpynuos gostu kolektivi – 15:00 stuņdēs Rēzeknis Nacionalūs bīdreibu kulturys nomā Ludzys nūvoda Isnaudys pogosta amatīrteatris izruodeis Monikys Zeilis lugu “Savedējs” (režisore Eleonora Obrumāne), kur sadzeiviskuos aineņuos atsakluoj meiļuotuoju vieļmis i cereibys.

17:00 stuņdēs Rēzeknis Kulturys nomā aicynuoti nūsavērt Prīkuļu pogosta kulturys noma amatīrteatra īstudiejumu “Krūze zaļā” (režisore Inese Pilābere) piec Mārtiņa Zīverta lugys nūtykumim, kū skatuviskā variantā puorlykuse Lelde Stumbre. Izruode stuosta par skaistim i nagaideitim dzeivis puorsteigumim, kod ticeiba laimei atsataisnoj.

19:00 stuņdēs Rēzeknis Nacionalūs bīdreibu kulturys nomā uzastuos Tiļžys amatīrteatris “Spogulis” ar Andreja Skaiļa stuosta dramatiziejumu “Kas citam bedri rok, pats tajā iekrīt” (režisore Inese Daukste), kas stuosta par dzeivē pījimtajim lāmumim i cik nu tim ir atkareiga lobkluojeiba, drūšeiba i dvēselis sirdsmīrs.

Amatīrteatru snāgumu viertēs profesionala žūreja – teatra zynuotneica i muokslys zynuotņu doktore Līga Ulberte, režisors Arnis Ozols, akters, dramaturgs i režisors Ēriks Vilsons, i lobuokī īstudiejumi tiks izvierzeiti Latvejis amatīrteatru īstudiejumu atlasis skatei “Gada izrāde 2013”.

Skateituoji ir aicynuoti baudeit akteru saspēli, atrast kotram sovu favoritizruodi i atbaļsteit akterus ar aplausim.

Karteņā: Rēzeknis Tautys teatra izruode “Astoņos pie šķirsta”. Karteņa nu Rēzeknis Tautys teatra arhiva.