Pasauļslavans jaunīšu kors “Main Street Singers” nu Amerikys sova Eiropys koncertceļuojuma ītvorūs uzastuos ari Latvejā. 9. aprelī 19.00 koncerts nūtiks Aglyunys bazilikā, bet 10. aprelī Daugovpiļs muzykys vydsškolā.

Ituo gods aprelī “Main Street Singers” paradzāta 17 dīnu gara koncertturs pa Krīveju, Igauneju, Latveju, Lītovu i Zvīdreju. Latvejā gaidami koncerti 9. aprelī Aglyunys bazilikā, 10. aprelī Daugovpiļs muzykys vydsškolā, 14. aprelī – Reigys Dūmā. Kors ir izveiduots 1984. godā i ir dabuojs patīsai storptautisku reputaceju. Nu dybynuošonys kora vadeituojs ir Marks Endrjū Šols. Korī dzīd Kalifornejis Los Altos High School studenti. 2013.–2014. g. sezonā “Main Street Singers” sastuovā ir 31 talanteigs dzīduotuojs. Jī ir atškireigi jaunīši, kurus vīnoj kaisleiba iz muzyku. Krīvejis i Baļtejis koncertturnejis ītvorūs koram paleidz ari Valmīrā dzymušuo talanteiguo varganiste i pianiste Līga Ivāne.

Divdesmit ostoņus godus koncertejūt, kors apceļuojs pīcdesmit devenis vaļsts sešūs kontinentūs. Jaunīši dzīd divdesmit četruos volūduos, ir snāguši jau vaira kai 360 koncertus. Jaunīšu kors ir struoduojs ar pasaulī labi zynomim orkestrim, tymā skaitā Pekinys Jaunīšu filharmoniskais orkestris, Limys i Buenosairesys Konservatorejis orkestri, Florencis “San Felice” orkestris i cyti. “Main Street Singers” pīsadaleja storptautiskajā koru festivalā Montrē, Šveicē, kur dabuoja pyrmū vītu.

Ziņa sagataveita piec koncerta organizatoru informacejis.