28. martā Upeitis pamatškolā i Upeitis Tautys nomā nūsarysynuoja tradicionalī Kūkovys nūvoda bārnu i jaunīšu folklorys svātki „Pulkā eimu, pulkā teku”. Svātkūs pīsadaleja sešys folklorys kūpys i treis kapelys. Svātku laikā žureja nu Reigys nu „Vaļsts Izgleiteibys i satura centra” Dina Liepa i Ernests Spīčs, kai ari Viļakys nūvoda kulturys metodike Sandra Ločmele izviertēja dalinīkus dzīduotuoju, doncuotuoju i kapelu konkursā.

Reits īsasuoce ar meistardarbneicom Upeitis pamatškolā, kur bārni varēja īsavuiceit zīpu līšonys procesu, izgatavejūt naudu nu vysaidim dobys materialim, kai ari vuicejuos veiduot parafina rūzeitis sveču dekoriešonai. Paraleli nūtyka dzīduotuoju konkurss, kurā pīsadaleja lobuokī dzīduotuoji nu Tiļžys, Upeitis i Brīžucīma.

Turpynuojums sekuoja Upeitis Tautys nomā. Ite izskanēja daudzys skaneigys dzīsmis. Vysi izdoncuoja vysaidus daņčus i rūtalis, kai ari ar daudzom skaneigom melodejom kapelys īskandynuoja Upeitis Tautys noma jaunū jumtu. Pasuokuma laikā žureja izviertēja lobuokūs doncuotuojus, skolu i jūstu lieciejus i dvīļu doncuotuojus. Tradicionalūs danču lītpratiejs Ernests Spīčs nūdemonstrēja iīvuiceja Sandrai Ločmelei dvīļu danča pamatprincipus. Vysys kūpys i tūs vadeituoji sajēme pateiceibys gon nu Viļakys nūvoda Izgleiteibys, kulturys i sporta nūdalis, gon ari nu Vaļsts izgleiteibys i satura centra.

Vysu konkursu uzvarātuoji nūpeļneja beletu 26. aprelī dūtīs iz Reigu, kur nūtiks nacionalais finals lobuokajim vaļsts tradicionalajim dzīduotuojim, doncuotuojim i muzicātuojim.

Paļdis vysim dalinīkim i tūs školuotuojim, paļdis Upeitis pamatškolys kolektivam, Upeitis kulturviesturis muzeja i bibliotekys vadeituojom, paļdis Viļakys nūvodam i Vaļsts kulturkapitala fondam par finansialu atbolstu.

Roksta autors: Upeitis Tautys noma vadeituojs Andris Slišāns

[Show slideshow]

◄ 1 ... 23 24 25 ►