Pavasars ir jaunuokuos latvīšu literaturys izviertiešonys laiks, kas parosti nūsaslādz ar Latvejis Literaturys goda bolvys padūšonu, kai ari jau trešū godu piec kuortys Latvejis literaturys izviertiešonu i aktualiziešonu Rēzeknis Augstškolā (RA), kurā 24. i 25. aprelī tiks reikuota 3. storptautiskuo zynuotniskuo konference “Autors. Teksts. Laikmets”.

3. storptautiskuo konference ir veļteita izcylam literaturys zynuotnīkam Valdim Ķikānam, kam itūgod byutu 85 godi. Kai īrosts, konferencis dorbs ritēs paraleli vairuokuos sekcejuos, vieršūt klauseituoju viereibu iz problemvaicuojumim aktualuokajūs vaicuojumūs literaturys zynuotnē, kritikā, viesturē.

Paraleli konferencis laikā nūtiks vysaidi pasuokumi: nūsarysynuos opoluo golda diskuseja “Teksta telpa” (pīsadaleis literaturys izdavumu puorstuovi: nu Latgolys: žurnals “A12”, rokstu kruojums “Olūts”, nu Kūrzemis: “Vārds”, nu Reigys: “Latvju Teksti”, “Tīrraksts”, portals UbiSunt). Pyrmuos dīnys izskaņā nūtiks dramys tekstu ideju konkurss “10 MINŪTES SLAVAS LATVIJĀ”– dramaturgejis lasejumi i RA Studentu teatra “ĶerRA” izruode – latvīšu i latgalīšu dzejis kompoziceja par pagaisušuo dāla temu “Atgriešanās”. Konferencis nūslāgumā tiks prezentēts 2. storptautiskuos zynuotniskuos konferencis “Autors. Teksts. Laikmets” kruojums, kai ari byus īspieja apmeklēt tradicionaluos Pūdnīku dīnys Rēzeknē.

Konferencis sadarbeibys partneri i atbaļsteituoji: Latvejis Rakstnīku savīneiba, Latvejis Literaturys centrs, Rēzeknis nūvoda dūme, Rēzeknis piļsātys dūme, Rēzeknis dūmis Izgleiteibys puorvaļde, A/S “Rīgas taksometru parks”, SIA “SB”, SIA “Impro ceļojumi”.

Konference byus radzama ari tīšraidē: www.ru.lv 24. aprelī, pylnu pasuokuma programu var apsavērt ite.

Ziņa sagataveita piec konferencis organizatoru dūtuos informacejis