Ūtrū godu piec kuortys nu 30. maja leidz 1. juņam Rēzeknē nūtiks Muokslys i muzykys festivals “SevenHills” 2014, kas puļcēs kūpā i vītejūs, i uorzemu muzikus, doncuotuojus i muokslinīkus.

Muokslys i muzykys festivala “SevenHills” nūsaukums i logo simboliski stuosta sevkuram uorzemu gostam par Rēzeknis septenim dzeivim i laikmeteigim pakolnim, kas sevi atspūguļoj vysaidu muokslys veidu izpausmēs – muzykā, dejā, vizualajā, vidis, skotuvis, īlu i improvizacejis muokslā.

Paguojušajā godā tyka apgleznuota baptistu lyugšonu noma sīna, ari itūgod – 30. majā Rēzeknē vēļ kaida kuorma sīna pīdzeivuos puorvierteibys, taipat byus īspieja īsasaisteit rodūšajuos darbneicuos i baudeit laikmeteiguos muokslys izstuodis, deju i alternativuos muzykys grupu uzastuošonys.

31. majā, festivala ītvorūs, guojieju promenadē gar Rēzeknis upi otkon nūtiks “Dzīvo skulptūru šovs”, kurā aicynuoti pīsadaleit na tik vītejī muokslinīki, bet īsarass ari Pasauļa dzeivūs skulpturu čempionata 2013. goda uzvarietuojs JOHNman nu Vuocejis.

Apmaklātuojim byus īspieja nūbolsuot par interesnuokū skulpturu i nūslāgumā vīna nu dzeivajom skulpturom dabuos skateituoju simpateju bolvu. Itūgod dzeivuos skulpturys viertēs ari žūreja, jemūt vārā tāla kūpējū viestejumu, dalinīka meistareibu, estetiskūs i izklaidejūšūs aspektus. Konkursa pīcys lobuokuos dzeivuos skulpturys, kurys dabuos vysleluokū punktu skaitu, sajims naudys bolvys, kūpejais bolvu fonds ir 500 eiro. (Seikuok par dzeivūs skulpturu konkursa viertiešonys kriterejim i bolvu pīškieršonu nūlykumā.)

Dzeivūs skulpturu konkursā var dasasaceit sevkurs interesents voi muokslinīku grupa leidz 2014. goda 12.majam, nūsyutūt aizpiļdeitu pīteikuma veidlopu un paradzātuos skulpturys skici iz e-postu kultur@rezekne.lv ar nūruodi “Dzīvās skulptūras.”

Sovukuort nakts koncertūs Festivala parkā uzastuos i vītejuos latvīšu i latgalīšu zvaigznis, i gosti nu sābrim – 30. majā Rēzeknē gasteis grupa “Boombox” nu Ukrainys, “Garbonatas bosistas” nu Lītovys i Latvejis grupa “Double Faced Eels”, 31. majā – Maks Korž nu Boltkrīvejis, “Teodore, Paul & Gabriele” nu Francejis i jau paguojušajā godā īpazeituo grupa “Indocile” nu Beļgejis. 1. juņa vokorā Festivala parku pīskandynuos “Dabasu durovys”, Sovvaļnīks, “Kapļi” i cyti vītejī muziki.

Ziņa sagataveita piec Rēzeknis Kulturys i Turisma centra dūtuos informacejis