Pīktais Latgolys vargaņu dīnu festivals nūtiks 2014. goda 20.- 29. junī Latgolys katuoļu bazneicuos. Festivala mierkis ir popularizēt vargaņspēlis kulturu i latvīšu vargaņmuokslu, kai ari dūt atspaidu vargaņu uzturiešonai i apkūpei. Latgolys vargaņu dīnys īcarātys kai lobdareibys pasuocīņs – īīšona vysūs koncertūs ir par zīdojumim. Ituo goda festivalā salaseitī zīduojumi tiks nūdūti vargaņu restauracejai Prezmys bazneicā.

Festivalā uzastuos varganisti: Kristīne Adamaite, Diāna Jaunzeme, Ilona Birgele, Iveta Pelša, Juoņs Pelšs, Larisa Carjkova, Jacinta Bicāne, Guna Kise, Daugovpiļs muzykys vydsškolys i J. Ivanova Rēzeknis Muzykys vydsškolys audziekni, Varakļuonu Muzykys i muokslys školys audziekni, kai ari solisti – nūpalnim boguotī saksofonisti Artis Seimaņs i Arvidas Kazlauskas. Festivala nūslāgumā uzastuos Aglyunys bazilikys jauktais kors “Assumpta”, dirigente Īva Lazdāne.

Koncertūs ar video projekcejis paleidzeibu varēs redzēt varganistu spēli tyvplanā! Kai ari, turpynojūt tradiceju, piec koncertu klauseituojim byus vareiba vāruot instrumenta demonstriejumus, aizdūt vaicojumus varganistim i paraudzeit sovus spākus, īsajiutūt varganista vītā.

Festivala nūrise:

• AGLYNYS BAZILIKA – 20. junī 20.00
• RĒZEKNIS SUOPU DĪVMUOTIS RŪMYS KATUOĻU BAZNEICA – 21. junī 19.00
• LEIKSNYS VYSSV. JEZUS SIRDS RUOMYS KATUOĻU DRAUDZIS BAZNEICA – 27. junī 19.00
• BORKOVYS SV. STANISLAVA RUOMYS KATUOĻU DRAUDZIS BAZNEICA – 28. junī 19.00
• MALNOVYS JAUNOVYS MAREJIS – RŪŽUKRŪŅA KARALĪNIS KATUOĻU DRAUDZIS BAZNEICA (Kuorsovā) – 29. junī 17.00
• RĒZEKNIS JEZUS SIRDS KATEDRALE – 29. junī 19.00

 Ziņa sagataveita piec pasuokuma organizatoru dūtuos informacejis