Ar Latvejis Nacionaluos bibliotekys Atbolsta bīdreibys starpnīceibu Latvejis bibliotekys duovynuojumā sajims rokstu kruojumu “Fedja. Teodors. Tulio”. 240 gruomotys par latvīšu – sūmu kinorežisoru sajims bibliotekys vysūs Latvejis regionūs. Vysvaira gruomotu aizceļuos iz Latgolys bibliotekom, partū ka taišni Latgolā aizasuoce Tulio naparostais dzeivisstuosts.

Gruomotu par izciluo Sūmejis kinorežisora  Teuvo Tulio dzeivi i kinom sastatejuse Kristīne Želve. Rokstu kruojumu veidoj poša Tulio atmiņu stuosti, roksti par juo daiļradi i boguoteigs ilustrativais materials. Gruomota guojuse klajā serejā “Kino Rakstu bibliotēka” ar Vaļsts Kulturkapitala fonda i Turlaju saimis atbolstu. Kruojums “Fedja. Teodors. Tulio” nominēts konkursam “Zelta ābele” par skaistuokū 2013. godā izdūtū gruomotu.

Latvīšu izceļsmis sūmu kinorežisors Tulio, eistajā vuordā Teodors Antonijs Tugajs, bierneibu pavadejs Latvejā, bet pi slavys tyka cytur. Tulio radejs pretruneigi vārtātys melodramys – kino klasikys pērlis. Jis saukts i par sūmu režisoru Nr.1 i “sūmu Valentino”. Ar sovys daiļradis i atmiņu stuostu starpnīceibu Tulio pādejūs godūs atsagrīž dzimtinē – jau 2012. godā, atzeimojūt Tulio symtgadi, ar Bīdreibys atbolstu Latvejis Nacionaluo biblioteka, Rēzeknis Centraluo biblioteka i Kino muzejs sajēme duovynuojumā Tulio kinu kolekceju i jam veļteitys gruomotys. Niu duovuotais rokstu kruojums “Fedja. Teodors. Tulio” ļaus itū spylgtū i izcilū personeibu ar latgalīša dvēseli īpazeit skaiteituojim vysā Latvejā.