Runoj, ka ekonomiskuo krīze Latvejī ir puorvarāta un asom atsagrīzuši pi izaugsmis. Taipat ari runoj, ka beidzīs arī klusais laiks Latgolys muzykā. Otkon var vāruot kū leidzeigu tai aktivitatei, kas beja Latgolys Radejis aktivuos darbeibys laikā. Pieški, kai nu puorpylneibys roga, sovus pyrmūs voi kuortejūs albumus izdūd vīna latgalīšu grupa piec ūtrys. Muzykanti, kuru darbeibys suokumi meklejami paguojušuos desmitgadis vydā, niu suoc sasnēgt muzykalū brīdumu, kas vad pi lykumsakareiga iznuokuma – ka na taustama, tod vysmoz klausama muzykys albuma.

Ir vairuokys grupys, kurys suoce darbuotīs gandreiž vīnlaiceigi – Bez PVN, Dabasu Durovys, Green Novice, LPIV, Inde Indive, Borowa MC, Kapļi i cytys. Daudzi itū latgalīšu “bumu” sauc par “Latgalīšu muzykys jaunū vilni”. Grupys eipaši naatsaškire nu sevkura cyta Latvejī asūša ansambļa. Nabeja vairs tik izteikta latgalīšim rakstureiguo tautys muzykys ītekme, nabeja jaušams tik pīrostais pīticeigums. Muzyka topa laikmeteiga un leidz ar tū uzrunuoja jaunīšu auditoreju – klauseituoju daļu, kū leidz šam latgaliski dzīdūšai apvīneibai da gola nabeja izadevs izdarāt. Roduos pyrmī aizmetni Latgolys modernuos muzykys tradicejai. Latgalīšu muzyku vysai naski preteimā jēme daudzys Latvejis radiostacejis, kas deve īspieju giut atpazeistameibu uorpus Latgolys.

Juoatzeist, ka vysom mynātajom grupom beja samārā zams profesionalais leimiņs, kas ilgus godus, vuorūtīs sovā sulā eipaši ari nauzalobuoja. Ja izveiduotu improvizātu Latvejis grupu rangu, tod Latgolys grupys vysys draudzeigi byutu meklejamys koč kur beigu daļā.

Leidz ar Latgolys radejis aktivuos darbeibys puortraukšonu un cytu Latvejis radiostaceju interesis pakuopenisku zudumu, lela daļa grupu sovu darbeibu voi nu īsaļdeja voi ari principā puortrauce. Palyka tikai daži.

Itim dažim niule suok “dzimt bārni” , nu tuos sāklys, kas tyka sāta pyrms desmit godim. Grupys sovu skaniejumu suok lānom “sakemmēt”, teik īraksteiti albumi. Tū var saukt par vēļ vīnu vilni, var saukt par atbluozmu, var filozofēt par tū byus voi nabyus popularuos latgalīšu muzykys tradicejis turpynuotuoji. Bet lobuok, īsoku vysim pameklēt škārsteiklā pādejā laikā izdūtūs albumus, tū pat vēļreiz izdarēt ari goda beiguos, īdzert lobu veinu i vīnkuorši pasaklauseit lobu muzyku nu Latgolys!

Roksta autors: Arņs Slobožaņins