1.junī dyžanuo latgalīša Mikeļa Bukša 102. dzimšonys dīnā Upeitis Tautys noma pošdarbnīki devēs ekskursejā pa Škilbānu pogostu. Tyka apmaklāts Rekovys vydsškolys muzejs, Rekovys vydsškola, Rekovys bazneica, Škilbānu pareizticeiguo bazneicu, izzynuota Rekovys i Škilbānu cīmu viesture. Paļdis ekskursejis organizatorei Ligitai Spridzānei i ekskurseis gidei Inesei Cibulei.

Tuoluok myus ceļš vede iz Plešovys cīmu pi Mikeļa Bukša pīminis vītys. Te Upeitis kulturviesturis muzeja vadeituoja beja nūorganizējuse Mikeļam Bukšam veļteitū latgaliskū piecpušdīni. Dīvamžāļ laika apstuokli nalutynuoja ar sauleiti, bet leja leits. Paļdis Bukšu sātys saiminīkim, kas myus vysus aicynuoja gostūs, kur ari pasuokums nūsarysynuoja. Pasuokuma laikā vysi dalinīki izlūzēja loterejis zeimeitis, kuruos beja fakti nu Mikeļa Bukša bierneibys, školys i studeju laikim, kai ari par tim godim, kas tyka pavadeiti trymdā Zvīdrejā. Fakti beja pīraksteiti latgalīšu volūdā, tī beja cīši juonūskaita, leidz ar tū īpazeistynojūt vysus dalinīkus ar Mikeli Bukšu i baudeit breineigū vareibu runuot latgalīšu volūdā. Ar jaukom latgalīšu dzīsmem, kurom vuordu autors ir Ontons Slišāns pasuokumā prīcēja Upeitis pamatškolys gitaristi i dzīduotuoji kūpā ar školuotuoju Tatjanu Supi, bet jautrys melodejis nūspēlēja Upeitis Tautys noma kapela, i ar skaneigom dzīsmem pīskandynuoja folklorys kūpa “Upīte”.

Ziņu sagataveja: Upeitis Tautys noma vadeituojs Andris Slišāns